Samfylkingin samþykkti í dag framboðslista uppstillinganefndar fyrir bæði Reykjavíkurkjördæmin en atkvæðagreiðsla um málið fór fram á allsherjafundi flokksins í dag og lauk rétt í þessu.

Ekki var kosið um nöfn einstakra frambjóðenda eða sæti þeirra á listunum heldur aðeins listana í heild sinni og voru þeir að lokum samþykktir þar sem 280 tóku þátt í kosningunni. Alls greiddu 79 prósent atkvæði með því að samþykkja listann, 17,5 prósent höfnuðu listanum og 3,5 prósent skiluðu auðu.

Ótrúlegur hugur í hópnum

Helga Vala Helgadóttir, þingmaður, skipar fyrsta sæti í Reykjavíkurkjördæmi norður, Jóhann Páll Jóhannson, blaðamaður, tekur annað sæti, Dagbjört Hákonardóttir, lögfræðingur, tekur þriðja sæti, Magnús Árni Skjöld, dósent, tekur hið fjórða, og Ragna Sigurðardóttir, forseti UJ, tekur fimmta sæti.

„Það er ótrúlegur hugur í þessum hópi sem skipar framboðslistann í Reykjavík, það er mikill lúxus að hafa svona fjölbreyttan hóp fólks sem er tilbúinn til þess að vinna að sigri Samfylkingarinnar í haust. Ég er þakklát flokksfólki í Reykjavík fyrir það traust sem mér er sýnt og hlakka til að hefja kosningabaráttuna strax á mánudag,“ segir Helga Vala.

Spennandi tímar framundan

Kristrún Mjöll Frostadóttir, hagfræðingur, mun síðan skipa fyrsta sæti í Reykjavíkurkjördæmi norður, Rósa Björk Brynjólfsdóttir, alþingismaður, skipar annað sæti, Viðar Eggertsson, leikstjóri, tekur þriðja sætið, Vilborg Oddsdóttir, félagsráðgjafi, tekur hið fjórða, og Birgir Þórarinsson, tónlistarmaður, tekur fimmta.

„Framundan eru mjög spennandi tímar fyrir Samfylkinguna og ég er ótrúlega þakklát fyrir það traust sem mér er sýnt. Ég hef mikla trú á þeim mannauði sem skipar listana í Reykjavík. Við stöndum á tímamótum í efnahagssögunni og ljóst að stefna stjórnvalda á næsta kjörtímabili mun hafa gífurleg áhrif á þróun efnahags-, velferðar- og loftslagsmála um áraraðir. Nú skiptir máli að Samfylkingin sé tilbúin að stíga fast til jarðar, leggi fram trúverðuga efnahagsáætlun sem byggir á fjárfestingu í mannauði jafnt sem efnislegum gæðum, og veiti skýran valkost fyrir almenning í kosningunum í haust. Ég stíg auðmjúk en ákveðin inn á hið pólitíska svið fyrir hönd Samfylkingarinnar og hlakka mikið til að vinna með flokknum,“ segir Kristrún.

Ósátt við að nýjum meðlimum sé hampað

Mikið ólga hefur verið innan flokksins síðastliðna daga vegna uppstillingamála en margir telja að óreyndir flokksmeðlimir sem hafa ekki unnið í málefnavinnu flokksins séu settir á undan reyndari flokksmeðlimum.

Jóhanna Vigdís Guðmundsdóttir, varaþingmaður Samfylkingarinnar, sagði sig til að mynda úr flokknum í gær þar sem henni mun hafa verið boðið þriðja sætið á listanum í Reykjavík norður. Þá hafa fleiri sagt sig úr flokknum vegna málsins.

Listana í heild sinni má nálgast hér fyrir neðan.

Reykjavík norður

  1. Helga Vala Helgadóttir, alþingismaður
  2. Jóhann Páll Jóhannsson, blaðamaður
  3. Dagbjört Hákonardóttir, lögfræðingur
  4. Magnús Árni Skjöld, dósent
  5. Ragna Sigurðardóttir, forseti UJ og læknanemi
  6. Finnur Birgisson, arkitekt
  7. Ásta Guðrún Helgadóttir, ráðgjafi
  8. Ásgeir Beinteinsson, fyrrverandi skólastjóri
  9. Magnea Marinósdóttir, alþjóðastjórnmálafræðingur
  10. Sigfús Ómar Höskuldsson, rekstrarfræðingur
  11. Sonja Björg Jóhannsdóttir, deildarstjóri í leikskóla
  12. Hallgrímur Helgason, rithöfundur
  13. Alexanda Ýr, ritari Samfylkingarinnar
  14. Hlal Jarrah, veitingamaður
  15. Ing Auðbjörg Straumland, formaður Siðmenntar og kaospilot
  16. Rúnar Geirmundsson, framkvæmdastjóri
  17. Kolbrún Birna Hallgrímsdóttir, laganemi
  18. Ólafur Örn Ólafsson, veitingamaður
  19. Sólveig Ásgrímsdóttir, sálfræðingur og formaður 60+
  20. 20. Vilhjálmur Þorsteinsson, hugbúnaðarhönnuður
  21. 21. Heiða Björg Hilmisdóttir,  varaformaður Samfylkingarinnar
  22. 22. Jóhanna Sigurðardóttir, fyrrverandi forsætisráðherra.

Reykjarvíkurkjördæmi suður

  1. Kristrún Frostadóttir, hagfræðingur
  2. Rósa Björk Brynjólfsdóttir, alþingismaður
  3. Viðar Eggertsson, leikstjóri
  4. Vilborg Oddsdóttir, félagsráðgjafi
  5. Birgir Þórarinsson, tónlistarmaður
  6. Aldís Mjöll Geirsdóttir, lögfræðingur
  7. Gunnar Alexander Ólafsson, heilsuhagfræðingur
  8. Ellen Calmon, borgarfulltrúi
  9. Viktor Stefánsson, stjórnmálahagfræðingur
  10. Elín Tryggvadóttir, hjúkrunarfræðingur
  11. Hlynur Már Vilhjálmsson starfsmaður á frístundaheimili
  12. Margret Adamsdóttir, leikskólakennari
  13. Axel Jón Ellenarson, grafískur hönnuður
  14. Ingibjörg S. Guðmundsdóttir, hjúkrunarfræðingur
  15. Jakob Magnússon, veitingamaður.
  16. Ingibjörg Grímsdóttir, þjónustufulltrúi
  17. Jónas Hreinsson, rafiðnaðarmaður
  18. Sólveig Jónasdóttir, kynningarfulltrúi Sameykis
  19. Hildur Kjartansdóttir, myndlistarmaður
  20. 20. Ellert B. Schram, fyrrverandi alþingismaður
  21. 21. Sigríður Ingibjörg Ingadóttir, fyrrverandi alþingismaður
  22. 22. Dagur B. Eggertsson, borgarstjóri.