Frá og með deginum í dag starfa sjúkraþjálfarar ekki lengur eftir samningi við Sjúkratryggingar Íslands. Samskipti sjúkraþjálfara og SÍ er í uppnámi og er staðan erfið að sögn Unnar Pétursdóttur, formanns Félags sjúkraþjálfara.

Órofa samstaða er meðal sjálfstætt starfandi sjúkraþjálfara um að standa vörð um faglega hagsmuni og velferð skjólstæðinga sinna.

Sjálf­stætt starfandi sjúkra­þjálfarar samþykktu í síðustu viku að þau muni ekki starfa eftir út­runnum ramma­samningi frá og með þriðju­deginum 12. nóvember 2019.

SÍ tilkynnti síðastliðinn nóvember að uppsagnafrestur umrædds rammasamnings væru sex mánuðir og væru sjúkraþjálfarar því bundnir áfram af ákvæðum samningsins, þrátt fyrir að hann hafi runnið út í janúar.

„Þeir sjúkraþjálfarar sem kjósa að hundsa ákvæði samningsins um uppsagnarfrest og verð fyrir þjónustu, verða dregnir til ábyrgðar.“

Unnur segir að sjúkraþjálfarar get ekki sætt sig við að starfa áfram á samningi sem ekki hefur verið leiðréttur í 9 mánuði. Þetta gerist í framhaldi af því að boðað var opið útboð á þjónustu sjúkraþjálfara, sem þeir telja að verði skaðlegt fyrir sjúkraþjálfun í landinu. 

„Framganga Sjúkratrygginga ber keim af því að verið sé að refsa sjálfstætt starfandi sjúkraþjálfurum fyrir að hafa efasemdir um það sé rétt að taka þátt í opnu útboði, sem var ávísun á fullkomna óvissu,” segir Unnur.

Forstjóri SÍ segist ætla draga sjúkraþjálfara til ábyrgðar

„Undir kvöld í gær barst síðan bréf frá forstjóra S.Í. Það reyndist innihalda rangfærslur og hótanir í garð sjúkraþjálfara, sem ævinlega hafa hagað málflutningi sínum og ákvörðunum með hagsmuni skjólstæðinga í huga. Forstjórinn fullyrðir þvert á móti að sjúkraþjálfarar séu skeytingarlausir um hagsmuni sjúkratryggðra. Við undrumst þau ummæli, svo ekki sé meira sagt,” segir Unnur.

Sjúkraþjálfarar buðust til að vera áfram í rafrænum samskiptum við SÍ en stofnunin kom í veg fyrir að sjúkraþjálfarar gætu farið af samningi og gerðu engar ráðstafanir til að gera aðilum kleift að vera í rafrænum samskiptum um endurgreiðsluhluta sjúklinga.

Bréf barst til Félags sjúkraþjálfara í gær frá maríu Heimisdóttur, forstjóra SÍ, en þar kemur fram að stofnunin telji fyrirætlanir sjúkraþjálfara bera vott um algert skeytingarleysi um hagsmuni sjúkratryggða.

„Það reyndist innihalda rangfærslur og hótanir í garð sjúkraþjálfara, sem ævinlega hafa hagað málflutningi sínum og ákvörðunum með hagsmuni skjólstæðinga í huga.“

„SÍ lýsa fullri ábyrgð á hendur sjúkraþjálfurum ef þeir ætla ekki að virða gildandi ákvæði samningsins og benda jafnframt á að þeir sjúkraþjálfarar sem kjósa að hundsa ákvæði samningsins um uppsagnarfrest og verð fyrir þjónustu, verða dregnir til ábyrgðar,“ segir í tilkynningu SÍ til sjúkraþjálfara.

María skorar á sjúkraþjálfara að láta af þessum fyrirætlunum „enda brjóta þær gegn gildandi ákvæðum í samningi aðila og hugsanlega lögum um samkeppni.“

Unnur segist harma þau óþægindi sem ágreiningurinn við SÍ gæti haft við skjólstæðinga.

„Sjúkraþjálfarar starfa því frá 12. nóvember samkvæmt eigin verðskrá og geta ekki haft milligöngu um sjálfvirka endurgreiðslu  með rafrænum hætti. Þess í stað verðum við að beina skjólstæðingum okkar til S.Í. varðandi endurgreiðslur, sem þeir eiga áfram rétt á lögum samkvæmt” segir Unnur.