„Heiður þeim sem heiður ber. Að sama skapi er þó engum til góðs að skapa falsmynd eða þegja þunnu hljóði þegar óréttlæti og grályndi blasir við,“ er meðal þess sem Guðni Th. Jóhannesson, forseti Íslands, sagði þegar hann ávarpaði starfsfólk álversins í Straumsvík á föstudaginn. Næsta víst er að þar vísar Guðni til Samherjamálsins.
„Ýmsar sögur eru til af erlendum stórrisum, sem hösluðu sér völl á nýjum stað og fóru offari, léku innfædda grátt, með blekkingum, svikum og mútum. Þannig framferði er auðvitað óverjandi,“ sagði forseti Íslands.
Hann lagði á það áherslu að Íslendingar yrðu að geta borið höfuðið hátt í útlöndum. „Ekki síst við sem höfum notið trausts til trúnaðarstarfa fyrir land og þjóð. Við viljum eiga okkar flaggskip og lofa þá sem þar eru á stjórnpalli, fólk í heimi menningar og mennta, íþrótta og lista, fólk í heimi hátækni og nýsköpunar, fólk í heimi iðnaðar og útvegs.“
„Lengi höfum við stært okkur af forystuhlutverki til sjávar, þekkingu okkar og reynslu og vilja til að vinna með öðrum, öllum til hagsbóta. Þetta hef ég gert nýlega, svo dæmi séu tekin, í heimsóknum ytra og þegar ég tók á móti nýjum sendiherra Namibíu eins og lesa má í frétt á heimasíðu embættisins: „Loks var rætt um fiskveiðar undan ströndum Namibíu og framtíðarhorfur þar í þágu heimamanna“, og var þá vísað til þróunarsamvinnu þar ytra.“
Þá sagði Guðni að mikilvægt væri fyrir þá sem komi fram í þágu Íslands, aðsjá í verki að unnið sé í heilindum í útvegi og öðrum greinum íslensks atvinnulífs. „Þeirri heildarmynd er vel hægt að halda við, sé vilji fyrir hendi.“
