Katrín Jakobsdóttir forsætisráðherra vill í svari sínu við fyrirspurn Fréttablaðsins ekki svara því með beinum hætti hvort hún taki undir orð Lilju Alfreðsdóttur viðskiptaráðherra sem gagnrýnt hefur Bjarna Benediktsson fjármálaráðherra vegna framkvæmdar við útboð Íslandsbanka.
Lilja telur að ábyrgð vankanta útboðsins liggi hjá fjármálaráðherra en ekki Bankasýslunni. Þá sagði Lilja að hún hefði sjálf gert athugasemdir fyrir söluna.
Fréttablaðið hefur falast eftir viðbrögðum annarra ráðherra við ummælum Lilju í dag. Í svari forsætisráðherra við fyrirspurn Fréttablaðsins segir að umræður hafi að sjálfsögðu orðið um fyrirkomulag á sölu hluta í Íslandsbanka í ríkisstjórninni þar sem ráðherrar lýstu skoðunum sínum. Enginn ráðherra hafi þó óskað að færa neitt til bókar. Hvorki þegar málið var rætt í ríkisstjórn né í ráðherranefnd um efnahagsmál.
„Mín afstaða hefur verið sú að ferlið yrði eins gagnsætt og skýrt og kostur væri, upplýsingargjöf væri góð og jafnframt lagði ég áherslu á að þingið fengi nægilegan tíma til að skoða málið enda taldi ég að það þyrfti tíma til að kynna sér þessa aðferð. Ennfremur - að lokinni sölu - lagði ég mikla áherslu á birtingu lista kaupenda sem fjármálaráðherra birti um leið og hann barst ráðuneytinu,“ segir Katrín Jakobsdóttir forsætisráðherra.
Hún segist eindregið styðja að málið verði skoðað ofan í kjölinn og úttekt Ríkisendurskoðunar sé eðlilegt skref í þeirri skoðun.
„Þá má bæta við að aldrei hefur staðið til að selja Landsbankann og það hefur legið fyrir frá því að ríkisstjórnin var mynduð í fyrra sinn. Ég tel eðlilegt að geyma allar frekari hugmyndir um sölu á hlutum í Íslandsbanka,“ segir Katrín.
