„Alþýðusamband Íslands fordæmir enn eina tilraunina til félagslegra undirboða í flugrekstri hér á landi. Nú er það Bláfugl með fulltingi SA sem hefur sagt upp flugmönnum í miðri kjaradeilu með hótun um að „leita annarra leiða“ til að lækka launakostnað,“ segir í tilkynningu ASÍ nú síðdegis.

Með þessu sé vegið að grundvallarréttindum stéttarfélaga og þar með öllu launafólki á Íslandi. Vitnað er í 4.grein laga nr.80/1938 um stéttarfélög og vinnudeildur þar sem atvinnurekendum er óheimilt að reyna að hafa áhrif á vinnudeilur eða stéttarfélagsaðild með uppsögn úr vinnu eða hótunum um uppsögn.

Í bréfi ASÍ er sagt að Bláfugl nýti sér þjónustu starfsmannaleiga sem þrátt fyrir skýr ákvæði laga nr. 139/2005 hafi ekki skráð sig hér á landi og enga grein gert fyrir kjörum starfsmanna sinna sem eiga að vera þau sömu og kjarasamningar hér á landi mæla fyrir um.

„Bláfugli er ekki heimilt að eiga viðskipti við starfsmannaleigur sem ekki sinna lögbundnum skyldum sínum og ASÍ skorar á Vinnumálastofnun að rísa undir hlutverki sínu og nota allar þær heimildir sem hún hefur til þess að tryggja að ekki séu stunduð félagsleg undirboð og lögbrot á íslenskum vinnumarkaði,“ segir í harðorðri tilkynningu ASÍ.

Miðstjórn ASÍ krefur Vinnumálastofnun um aðgerðir vegna þessa.