Eloy­se Paquet Pois­son, ung kona bú­sett í borginni Quebec í Kanada, lá í sól­baði í góða veðrinu í al­mennings­garði þann 29. maí síðast­liðinn.

Hlýtt var í veðri þennan dag og á­kvað Eloy­se að kæla sig niður með því að fara úr að ofan. Eloy­se taldi ekkert mæla gegn því enda voru margir aðrir gestir al­mennings­garðsins berir að ofan. Munurinn var þó sá að allir hinir voru karl­kyns á meðan hún var eina konan.

Ó­hætt er að segja að þetta at­vik í lok maí hafi undið upp á sig því um helgina fóru fram mót­mæli í Mont­real þar sem fjöl­margar konur, berar að ofan, komu saman í al­mennings­garði.

Karlar líka berir að ofan í garðinum

Í um­fjöllun kanadískra fjöl­miðla kemur fram að ekki hafi liðið á löngu þar til lög­reglu­maður kom að Eloy­se og bað hana að hylja brjóstin. Eloy­se neitaði og spurði lög­reglu­þjóninn hvers vegna hann sneri sér ekki að öðrum karl­kyns gestum sem voru einnig berir að ofan.

Um tíu mínútum síðar kom lög­reglu­þjónninn aftur og var þá með nokkra aðra laganna verði með sér. Kröfðust þeir þess að hún myndi hylja brjóst sín, ellegar eiga á hættu að vera hand­tekin fyrir að ó­hlýðnast fyrir­mælum lög­reglu.

Úr­eltur hugsunar­háttur

Eloy­se skrifaði færslu á Face­book-síðu sína um málið og er ó­hætt að segja að færslan hafi vakið mikla at­hygli í Kanada. Um liðna helgi söfnuðust til dæmis fjöl­margar konur saman í al­mennings­garði í Mont­real þar sem þær fóru úr að ofan en um var að ræða eins­konar sam­stöðu­mót­mæli með Eloy­se.

Þó að Eloy­se hafi þurft að játa sig sigraða þennan dag í lok maí­mánaðar segir hún að sá tími sé liðinn að kven­manns­brjóst séu eitt­hvert tabú. Löngu tíma­bært sé að breyta úr­eltum hugsunar­hætti í sam­fé­laginu.

CTV News og Global News hafa fjallað um málið og segir Eloy­se að karl­kyns gestir hafi gert at­huga­semdir við af­skipti lög­reglu þennan dag. Einn, sem naut veður­blíðunnar ber að ofan, hafi til dæmis spurt hvort hann ætti yfir höfði sér hand­töku fyrir að vera ber að ofan.

Fór fyrir brjóstið á mörgum

Eloy­se segir í færslu sinni að lög­reglu­mennirnir sem höfðu af­skipti af henni hafi í raun verið sam­mála henni. Þeir hafi þó fengið kvörtun frá gesti í garðinum og brugðist við henni. Hún bendir á að ekkert í lögunum banni konum að vera berar að ofan á al­manna­færi og því hafi þessi af­skipti lög­reglu komið flatt upp á hana.

Jeanne-Mance Park, skipu­leggjandi mót­mælanna í Mont­real um helgina, sagði við kanadíska fjöl­miðla í gær að gjörningurinn færi ef til vill fyrir brjóstið á mörgum. „Að mínu mati er það gott, því þegar allt kemur til alls erum við sækjast eftir viður­kenningu á því að fá að nota líkama okkar eins og við viljum nota hann.“

Mynd/Getty Images
Mynd/Getty Images