Mikill viðbúnaður var í Krossá þegar rúta festist í ánni við Húsadalsvaðið um hádegisbilið í dag en miklir vatnavextir eru nú að Fjallabaki og á Þórsmerkursvæðinu. Skálaverðir Ferðafélags Íslands mættu skömmu síðar og björguðu fólki úr rútunni áður en björgunarsveitir mættu á vettvang.
„Það voru rúmlega 30 manns um borð í rútunni sem voru í hættu og fyrst um sinn þá leit þetta svona í sjálfu sér ekki vel út,“ segir Davíð Már Bjarnason, upplýsingafulltrúi Landsbjargar, í samtali við Fréttablaðið um málið en björgunarsveitir voru kallaðar út frá Hvolsvelli og Hellu þegar útkallið barst.
Að sögn Davíðs barst útkallið rétt fyrir klukkan tólf í dag og klukkan hálf eitt var búið að bjarga öllum úr rútunni. Mikilvægt var að koma þeim út sem fyrst þar sem það er hætta á að bílar sem festast í ám losni skyndilega og straumurinn snúið þeim við.
Aðspurður um líðan þeirra sem voru í rútunni og hvort einhver hafi þurft á læknisaðstoð að halda segist Davíð ekki hafa upplýsingar um það en svo virðist sem allt hafi gengið vel.
„Ég veit alla vega þegar ég talaði við fólk þarna hálf eitt þá gekk þetta alla vega vel og vonum framar, það er alltaf hætta í kringum svona straumvatn og menn vita aldrei hvað getur gerst, þannig að um leið og það var búið að koma öllum í land og það var yfirstaðið þá önduðu allir léttara,“ segir Davíð.
Líkt og áður segir eru nú miklir vatnavextir á svæðinu og ferðafólk hvatt til að fara varlega. Að sögn Davíðs eru björgunarsveitirnar alltaf til taks auk þess sem sjálfboðaliðar á þeirra vegum eru oft að sinna öðrum verkefnum eða í útivist á svæðinu.
„Það var tilfellið núna, það var björgunarsveitarfólk sem var vant svona verkefnum sem var þarna á svæðinu og gat brugðist fljótt við, sem stundum bara skiptir algerlega sköpum.“
