Vinningshafinn sem vann 45 milljónir í Happdrætti Háskóla Íslands á þriðjudaginn var, segir að peningarnir muni gjörbreyta lífi hans en þegar vinningshafinn fékk „besta símtal lífs síns,“ eins og hann orðaði það, átti hann erfitt með að halda aftur af tárunum, slík var gleðin.

Þetta kemur fram í tilkynningu frá Happdrætti Háskólans, en þar segir að vinningshafinn hafi farið illa út úr hruninu, þar sem lán sem áttu að vera til skamms tíma urðu að langtíma vandamáli sem hann er enn að greiða af, rúmlega tíu árum seinna.

Milljónirnar fjörutíu og fimm gera það því að verkum að vinningshafinn getur greitt upp lánin, er farinn að plana starfslok og er byrjaður að skipuleggja áhyggjulaust ævikvöld án þess að burðast með fortíðarlánadrauga á bakinu.