Tómas A. Tómasson, þingmaður Flokks fólksins, flutti ræðu á Alþingi 5. apríl síðastliðinn um ferð til Bangkok.

Þingmaðurinn hefur verið til umfjöllunar í dag vegna smáskilaboða sem hann sendi til vinar síns heitins, um konu sem hann svaf hjá í Bangkok, Taílandi árið 2014.

„Ein dasamleg 25 ara ca 45 kg var ad yfirgefa herbergid smokklaust en byrjadi a nuddkonunni fyrr i dag kvoldid er ungt 20.21“ segir í skilaboðunum. Tómas hefur þverneitað fyrir það að umræðuefnið hafi snúist um vændiskaup.

Á meðan þing­menn stjórnar­and­stöðunnar kepptust við að komast í pontu Alþingis þann 5. apríl til ræða mál­efni Sigurðar Inga inn­viða­ráð­herra, á­kvað Tómas að ræða um stolt sitt að vera Ís­lendingur og ferða­lög sín um heiminn, meðal annars til Bang­kok.

„Ég hef ferðast meira en góðu hófi gegnir um allan heim og alls staðar sem ég kem þá segi ég að ég sé frá Íslandi og ég er mjög stoltur af því. Ég var í Bangkok á tveimur stöðum sama daginn. Ég sagði: Ég er frá Íslandi. Þá sagði viðmælandi minn: Eiður Guðjohnsen,“ sagði Tómas.

„Ég var í Buenos Aires og þá sagði viðmælandi minn: GusGus. En það sem ég vildi segja við ykkur er þetta: Árið 1991 fór ég til San Diego í boði Jóns Sigurðssonar sem seinna varð ráðherra og hann fór með mig á samkomu Íslendinga í alþjóðagarðinum í San Diego. Þar voru samankomnir 40 einstaklingar sem flestir töluðu ekki íslensku og höfðu margir hverjir aldrei komið til Íslands. En þeir voru svo stoltir af því að vera Íslendingar að þeir höfðu þörf fyrir að láta alla vita. Ég segi bara: Sitt sýnist hverjum.“