Brottvísanir hælisleitenda eru hafnar frá Íslandi eftir að hafa legið að mestu niðri í tvö ár. Að sögn Magnúsar D. Norðdahl lögmanns einbeitir lögreglan sér nú að þeim hælisleitendum sem til stendur að vísa til Grikklands. Um er að ræða nokkuð stóran hóp, eða á þriðja tug flóttamanna nú þegar. Fjöldinn gæti stórvaxið.

Lítið hefur verið um brottvísanir síðustu tvö ár vegna Covid-ferðatakmarkana. Magnús segir að í byrjun vikunnar hafi allt farið af stað.

Fréttablaðið fékk staðfest hjá stoðdeild lögreglu að hömlur vegna kröfu um bólusetningar væru úr sögunni og flutningar hæfust á ný.„Umbjóðendur mínir hafa fengið símtöl undanfarna daga með tilkynningu um fyrirhugaða framkvæmd brottvísunar,“ segir Magnús.

Að sögn Magnúsar er í einhverjum tilvikum um að ræða fólk sem hefur verið hér í töluvert langan tíma og fest hér rætur, fengið vilyrði um vinnu, eignast barn og myndað tengsl við íslenskt samfélag.

„Meðal annars er í hópnum kona gengin átta mánuði á leið,“ segir Magnús sem kveður ómannúðlegt að vísa fólki til Grikklands.

„Aðstæður þar fyrir flóttafólk eru algjörlega óásættanlegar og margir sem hafast við á götunni.“

Sérstaklega ómannúðlegt er, að sögn Magnúsar, að vísa frá Íslandi hælisleitendum sem hafa dvalið hér í lengri tíma og fest hér rætur.

„Heimsfaraldur kórónaveiru takmarkaði mjög tækifæri stjórnvalda til að vísa fólki á brott, sem jók tímalengd dvalar hér á landi. Að taka þann hóp núna og reka úr landi er ámælisvert og ekki í anda samfélags mannúðar og kærleika.“