Alma Dagbjört Möller tók við embætti landlæknis 1. apríl 2018 og varð þá fyrsta konan sem var ráðin í þetta „elsta djobb landsins“, eins og bróðir hennar, þingmaðurinn og ráðherrann fyrrverandi Kristján L. Möller, orðar það.

Eftirherman og grínarinn Jóhannes Kristjánsson kynntist Ölmu sem lækni þegar skipt var um hjarta í honum fyrir allmörgum misserum og taldi hana við fyrstu sýn vera engil sem kann að skýra sýn hans á hana í embættinu.

Þriðji landlæknirinn

„Hún er bara hreint og beint einstök enda er hún nú þriðji landlæknirinn sem við höfum haft. Það var bara Bjarni Pálsson 1760, svo kom Ólafur landlæknir og svo kom Alma,“ segir Jóhannes og skellir upp úr.

Þótt grínarinn skauti þarna full hratt yfir íslenskt landlæknatal er þó engum blöðum um það að fletta að Alma er á rétt sléttum tveimur árum meðal nafntoguðustu landlækna sögunnar.

Á rétt tæpum tveimur árum er Alma orðin einn nafntogaðasti landlæknir langrar sögu embættisins og stendur heldur betur í ströngu.
Fréttablaðið/Ernir

Geislandi af öryggi og mildri staðfestu hefur hún verið í fremstu varnarlínu stjórnvalda gegn kórónaveirunni ásamt þeim Víði Reynissyni yfirlögregluþjóni og Þórólfi Guðnasyni sóttvarnarlækni.

Þríeykið þykir hafa einstakt lag á að miðla alvarlegum upplýsingum til almennings án þess að kynda undir ótta eða vekja tortryggni.

Ákveðin og flippuð

„Ég held að ekki hafi verið hægt að skipa betri manneskju í að tækla nákvæmlega þetta verkefni,“ segir eldfjallafræðingurinn Helga Kristín Torfadóttir um landlækninn móður sína.

„Ég held að það sé alveg rétt,“ tekur litli bróðir hennar, Jónas Már Torfason lögfræðingur, undir. „Hún er bara svo hreinskilin, örugg, alltaf í jafnvægi og segir bara það sem þarf að segja á þessum blaðamannafundum og er nógu staðföst til að vera ekkert að blása það út að óþörfu.“

Þegar Helga og Jónas eru í framhaldinu einfaldlega spurð hvernig mamma Alma landlæknir sé, ber þeim saman í veigamiklum atriðum. „Hún er náttúrlega mjög dugleg og ákveðin en samt mjög flippuð,“ segir Helga. „Það er mikill húmor á heimilinu og mikið hlegið en hún er samt ákveðin inn á milli.“

Jónas tekur heils hugar undir með stóru systur: „Hún hefur alltaf verið ákveðin og haft vit fyrir mér og passaði upp á að maður væri ekki að gera einhverja vitleysu. Í seinni tíð hef ég kunnað mjög að meta þetta og kann henni miklar þakkir fyrir það í dag.“

Jónas bætir við að eftir að hann komst til vits og ára hafi lengst í taumnum og „í dag erum við miklu meira vinir heldur en bara mæðgin. Hún er mikill húmoristi og rosalega flippuð og þannig sér maður hana alvarlega og yfirvegaða á þessum blaðamannafundum en svo kemur hún heim og er bara eitthvað að fíflast í manni. Hún er alger negla sko,“ segir Jónas og stoltið leynir sér ekki.

Kristján, bróðir Ölmu, og Helena, móðir þeirra, telja að á myndinni sé land­læknirinn til­vonandi fjögurra og hálfs árs og ráð­herrann fv. þá tólf og hálfs.
Fréttablaðið/Samsett

Heimilið er öruggasta vígið

Alma fæddist á Siglufirði og er lang yngst í hópi sex barna hjónanna Jóhanns Georgs Möller og Helenu Sigtryggsdóttur. Jóhann var verkstjóri og bæjarfulltrúi Alþýðuflokksins á Siglufirði, en hann lést 1997.

„Það er svo gaman þegar ég horfi á þessa mynd,“ segir Kristján Möller um meðfylgjandi æskumynd af þeim Ölmu og hillu í bakgrunninum sem enn prýðir heimili 96 ára gamallar móður þeirra.

„Á henni stendur: Heimilið er besta og öruggasta vígi hvers manns. Faðir okkar skar þetta út fyrir langa löngu og núna eru heimilin besta og öruggasta vígi hvers manns meðan þessi faraldur gengur.“

Víðsýnn stjórnandi

„Til að lýsa manneskju eins og Ölmu væri auðvelt fyrir mig að rita langan lista af fallegum lýsingarorðum en sá listi yrði að líkindum lengri en plássið hér leyfir,“ segir Kjartan Hreinn Njálsson, aðstoðarmaður landlæknis.

„En „víðsýni“ er fyrsta orðið sem kemur upp í huga minn þegar ég hugsa um Ölmu. Í þessum eiginleika hennar felst ekki aðeins að hún á með eindæmum auðvelt með að setja sig í spor annarra, heldur einnig sú staðreynd að hún er merkilega lagin við að sjá stóru myndina, samhengi hlutanna.“

Nýtur augnabliksins

„Ég hef ekki unnið lengi fyrir Ölmu og er því svo lukkulegur að eiga eftir að kynnast henni enn betur, en víðsýni er ekki aðeins vitnisburður um hæfan stjórnanda. Víðsýni er nefnilega einnig merki um manneskju sem hefur tamið sér gagnrýna hugsun, manneskju sem kann að njóta augnabliksins og slá á létta strengi.

Aðstoðarmaðurinn Kjartann Hreinn og hjartaþeginn og grínarinn Jóhannes Kristjánsson fara ekki leynt með aðdáun sína á Ölmu Möller.
Fréttablaðið/Samsett

Víðsýni Ölmu birtist einnig í mikilli baráttu hennar við helsta óvin þeirra sem starfa í krísuástandi; rörsýn og þeirri mikilvægu vitneskju um að stundum veit maður ekki hvað maður veit ekki. Í stjórnandanum Ölmu sé ég manneskjuna, mömmuna, lækninn og vininn Ölmu og ég er afar þakklátur að hafa fengið tækifæri til að kynnast þessari öflugu konu.“

Vísindaleg blíða

„Hún er alveg rosalega örugg, ákveðin og klár,“ segir Jóhannes grínari. „Þetta segja mér allir sem hafa þekkt hana í gegnum tíðina,“ segir hann og segist helst kannast við hana frá því hann vaknaði eftir að hafa fengið nýtt hjarta.

„Þótt ég hafi ekki vitað það þá bjóst ég við því að hún tæki á þessu af þessari festu, og vísindalegu blíðu,“ segir Jóhannes um framgöngu Ölmu í COVID-fárinu.

„Alma er nú þannig að hún getur farið gegnum ellefu metra steinvegg án þess að hika. Hún eiginlega getur allt og er alltaf í jafnvægi en þegar ég opnaði augun á gjörgæslunni, þá var hún beint fyrir ofan mig og þá hugsaði ég með mér að þetta hefði mistekist. Ég hélt að ég væri kominn til himnaríkis. Hún er svo falleg hugsaði ég, en svo velti ég hausnum til vinstri og þá sá ég Felix svæfingalækni og þá vissi ég að það gat ekki verið að ég væri í himnaríki.“

Náin kjarnafjölskylda

Alma er gift Torfa Fjalari Jónassyni hjartalækni og Helga Kristín segir fjölskylduna mynda þéttan kjarna. „Við erum mjög mikið saman fjögur og hundurinn Móberg. Við höfum ferðast og ferðumst mikið og erum mjög þéttur kjarni.“

Fjölskyldan á góðri stundu með hundinum Móbergi.
Mynd/Helga Kristín

Þegar talið berst að því hvort landlækni sé hætt við að ofvernda uppkomin börnin sín á samgöngubannsdögunum kemur Helga með óvænta uppljóstrun.

„Það er eiginlega ég sem er ströngust með sprittið og geng milli allra hurðarhúna og spritta og þá sérstaklega til þess að það sé ekkert að berast í hana. Ég spritta allt sem hún kemst í tæri við. Þannig að það er frekar ég sem garga á hana að spritta sig þegar hún kemur heim.“

Alma Dagbjört Möller

Fædd: 24. júní 1961

Menntun: Stúdentspróf frá Menntaskólanum á Akureyri, læknapróf frá Háskóla Íslands, sérfræðiviðurkenning og doktorsgráða í svæfinga- og gjörgæslulækningum frá Háskólanum í Lundi í Svíþjóð, meistarapróf í stjórnun heilbrigðisþjónustu og lýðheilsu og sérfræðiviðurkenning í heilbrigðisstjórnun.

Starf: Landlæknir