Íbúar í Botnahlíð, Bröttuhlíð og við Baugsveg og Austurveg á Seyðisfirði geta snúið aftur heim að sögn almannavarna.

Sérfræðingar Veðurstofu Íslands könnuðu aðstæður í Botnabrún í dag og ekki er að sjá neinar breytingar að ráði frá því fyrir jól.

Hreyfing hefur verið mæld daglega og er hún lítil sem engin og er því talið að stöðugleiki hafi aukist nægilega mikið til þess að hægt sé að aflétta frekari rýmingu.

Staðan í farvegi stóru skriðunnar sem féll föstudaginn 18. desember og í nágrenni hennar verður skoðuð frekar á morgun. Á vefsíðu Veðurstofu Íslands má sjá að enn er hættustig vegna skriðufalla á Seyðisfirði.

Kort af því svæði þar sem rýming á Seyðisfirði er áfram í gildi.
Mynd: Almannavarnir