Karlmaður var í dag dæmdur í átta mánaða fangelsi fyrir að hafa sex sinnum berað og handleikið kynfæri sín og kastað af sér þvagi í viðurvist barna og fullorðinna á æfingarsvæði Þróttar í Laugardalnum.
Það er MBL sem fyrst greinir frá en maðurinn var orðinn þekktur á svæðinu sem „flassarinn í laugardalnum“ og hafði áður verið til umfjöllunar í fjölmiðlum.
Samkvæmt upplýsingum mbl.is var maðurinn á skilorði en refsing hans var dæmd upp, en dómur málsins hefur enn ekki verið birtur á vef héraðsdómsins.
Játaði brot sín fyrir dómi
Maðurinn hefur ítrekað komið við sögu lögreglu vegna blygðunarsemisbrota gagnvart börnum og fullorðnum í Laugardalnum.
Maðurinn játaði brot sín þegar mál hans var tekið fyrir um síðustu áramót í Héraðsdómi Reykjavíkur.
Þá flokkast brot mannsins sem kynferðis brot en einnig fíkniefnabrot og brot gegn barnaverndar- og áfengislögum. Var maðurinn í flestum tilfellum undir áhrifum vímuefna og áfengis þegar brotin áttu sér stað.
Foreldrar þeirra stúlkna sem urðu vitni að framkomu mannsins fóru fram á 800 þúsund krónur í miskabætur vegna málsins en ekki hefur komið fram hvort dómurinn hafi orðið við kröfu þeirra.
