Um þrjú þúsund manns höfðu skráð sig í skimun fyrir Covid-19 í gær, þegar Fréttablaðið náði tali af Óskari Reykdalssyni, forstjóra Heilsugæslu höfuðborgarsvæðisins. „Þar af eru 1.700 skráðir í einkennasýnatöku og hinir að skrá sig í sóttkví. Það er kannski örlítið meira en hefur venjulega verið, en samt minna en var núna í síðustu viku á þessum tíma dags. Það hefur því ekki orðið nein holskefla eftir verslunarmannahelgi.“

„Staðan er sérstök fyrir þær sakir að við erum í verslunarmannahelgi og þá er kannski eðlilegt að það hafi verið færri sýnatökur heldur en í síðustu viku, en þó alveg mörg sýni,“ segir Hjördís Guðmundsdóttir, upplýsingafulltrúi almannavarna, um stöðuna í kórónaveirufaraldrinum.

„Maður hefur séð það á röðunum við Suðurlandsbrautina að fólk er að fara í sýnatöku, sem er jákvætt og við búumst við að í næstu viku muni bætast verulega í það. Tölurnar síðustu tvo daga eru kannski ekki alveg það sem við höldum að verði í næstu viku. Auðvitað vona allir hið besta en búast frekar við hinu versta. Það er pínu eðli okkar vinnu.

Við allavega erum tilbúin í að í næstu viku verði fleiri smit heldur en hefur verið síðustu tvo daga, án þess að maður viti neitt.“

Hjördís telur að þróunin í næstu viku muni varpa frekara ljósi á það hverjir verði í áhættuhópum vegna Delta-afbrigðis kórónaveirunnar og gefa þannig skýrari mynd af þessari fjórðu bylgju Covid-faraldursins.

Hjördís Guðmundsdóttir er upplýsingafulltrúi almannavarna.
Fréttablaðið/Ernir

Fjölgar eftir helgar

Óskar segir að venjulega fjölgi skráningum í skimun eftir helgar og að viðbúið hafi verið að fjölgun yrði mikil eftir frí- og hátíðardaga eins og verslunarmannahelgina. „En einmitt núna eru engin merki um neitt annað en það sem hefur verið. Fólk er mjög samviskusamt með að koma í skimun og við erum að vinna í að tryggja mönnun, sem er alltaf áskorun.

Við erum aðeins að fjölga starfsfólki í næstu viku, sérstaklega í sýnatökurnar á Suðurlandsbraut. Þegar fjöldi skráninga er orðinn svona dag eftir dag verðum við að bregðast við til að geta stytt biðraðirnar og biðtímann í skimun.“

Runólfur Pálsson, yfirmaður Covid-göngudeildar Landspítala.
Fréttablaðið/Anton Brink

Staðan tvísýn

Í gær lágu fimmtán einstaklingar á Landspítalanum vegna alvarlegra veikinda af völdum Covid-19, flestir með lungnabólgu. Fimm þeirra höfðu verið lagðir inn sólarhringinn áður.

Runólfur Pálsson, yfirmaður Covid-göngudeildar spítalans, sagði um helgina að staðan á spítalanum væri tvísýn. „Ef horft er á þennan stóra hóp smitaðra þá er staðan önnur en í fyrri bylgjum því það voru engar bólusetningar. En þegar fjöldinn er svona mikill þá þarf ekki marga sem veikjast alvarlega til að hafa mikil áhrif á spítalann.“