Dæmi er um að fjöldi innflytjenda á kjörskrá sveitarfélaga hafi fjórfaldast með nýjum kosningalögum frá því um áramót.

Einar Freyr Elínarson, oddviti Mýrdalshrepps, segir að með breytingu á kosningalögum um áramótin hafi fjöldi kjósenda af erlendum uppruna þar farið úr 56 manns í 211. Eru það 42 prósent þeirra sem eru á kjörskrá þar að þessu sinni.

Helstu breytingar á lögum eru að skemmri tíma þarf nú til að fá kosningarétt og Norðurlandabúar fá réttinn er þeir flytja lögheimili.Kosið verður til sveitarstjórna um aðra helgi. Fréttablaðið sagði frá því nýlega að sumir íbúar af erlendum uppruna í Breiðholtinu vissu ekki af eigin kosningarétti.

Einar Freyr segir sömu sögu á Suðurlandi. Gríðarleg breyting hafi orðið á samfélagsgerðinni. Nefnir oddvitinn sem dæmi að kosningafundur Framsóknarmanna í Mýrdalshreppi hafi farið fram á ensku.

„Áskorunin er að ná til allra, virkja alla,“ segir Einar Freyr.Mýrdalshreppur hefur hæsta hlutfall innflytjenda, 47,3 prósent. Í Skaftárhreppi og Súðavíkurhreppi er hlutfallið um þriðjungur og fjórðungur í Reykjanesbæ. Í Reykjavík er hlutfallið 13,6 prósent, sem er nærri landsmeðaltali.Sjálfstæðisflokkurinn í Fjarðabyggð er eitt þeirra framboða sem leggja áherslu á að ná til innflytjenda. Hefur efni verið birt á ensku og pólsku. Framboðsfundir um grunnatriði voru haldnir á pólsku.

Ragnar Sigurðsson, oddviti í Fjarðabyggð, segir að með því að tala til þessa hóps á hans móðurmáli finnist fólki það meira velkomið og sé líklegra til að kjósa.

Í Fjarðabyggð eru um 350 Pólverjar á kjörskrá af rúmlega 800 innflytjendum. Þar hefur innflytjendum fjölgað mikið á kjörskrá líka

„Við bindum vonir við að kjörsókn meðal innflytjenda rjúki upp í þessum kosningum,“ segir Ragnar.Samkvæmt rannsókn Háskólans á Akureyri frá 2019 var þátttaka innflytjenda í sveitarstjórnarkosningunum árið 2018 aðeins 30,3 prósent.

„Það vantar tengingu við kjörna fulltrúa og upplýsingar um hversu mikilvægar kosningarnar eru,“ segir Nichole Leigh Mosty, forstöðumaður Fjölmenningarseturs. Mikilvægt sé að fólk fái upplýsingar um hvar sé kosið, hvernig og um hvað.