Lögreglan á höfuðborgarsvæðinu hafði í mörg horn að líta á helgarvakt sinni á höfuðborgarsvæðinu en alls 23 líkamsárásir voru tilkynntar, þar af þrjár alvarlegar.

Þá fór lögreglan einnig í fjórtán útköll vegna heimilisofbeldis, að því er fram kemur í stöðuuppfærslu lögreglunnar á Facebook.

Fjögur innbrot voru tilkynnt til lögreglunnar og fimm þjófnaðarmál.

Alls voru 29 ökumenn teknir fyrir ölvunar- og fíkniefnaakstur í umdæminu um helgina. Þrír voru staðnir að því að aka á bifreiðum búnum nagladekkjum og þurfti lögreglan að hafa afskipti af á annan tug ökumanna vegna ökutækja sem voru ýmist ótryggð eða óskoðuð.