Í síðustu viku greindist starfsmaður Reykjalunds með Covid-19. Er það í fyrsta sinn sem að smit greinist á Reykjalundi.

Nú hefur komið í ljós að fleiri starfsmenn hafa smitast en sá eini sem uppgötvaðist síðasta miðvikudag og eru nú alls fjórir starfsmenn smitaður. Þá er vitað að minnsta kosti einn skjólstæðingur hefur greinst jákvæður fyrir Covid-19.

Meðferðarhlé frá og með morgundeginum

Í öryggisskyni var hluta af starfsemi Reykjalundar lokað tímabundið í síðustu. 18 starfsmenn fóru í sóttkví og var haft samband við þá skjólstæðinga sem verið höfðu návist starfsmannsins sem smitaðist. Fóru þeir ýmist í sóttkví og sýnatöku eða gerðu tímabundið hlé á sinni meðferð á Reykjalundi.

Vegna þessa hefur framkvæmdastjórn Reykjalundar ákveðið að gera meðferðarhlé hjá öllum þjónustuþegum dag- og göngudeilda Reykjalundar vikuna 21.-25. september. Um 100-120 manns heimsækja Reykjalund daglega í þessum tilgangi. Þetta þýðir að gert er hlé á meðferðum allra átta meðferðarteyma þessa viku. Starfsemi heilsuræktar Reykjalundar verður jafnframt lokuð umræddan tíma enda hluti starfsmanna í sóttkví.

Starfsemi sólarhringsdeildarinnar á Miðgarði sem og starfsemi Hleinar halda áfram, en búast má við skerðingu á þjónustu þar. Verið er að reyna ná í skjólstæðinga Reykjalundar eftir bestu getu og tilkynna þeim þetta.

„Við hörmum þau óþægindi sem þetta kann að valda skjólstæðingum og starfsfólki. Jafnframt ber að þakka starfsfólki Reykjalundar og öðrum sem að málinu hafa komið, fyrir snör og markviss vinnubrögð sem vonandi hafa leitt til þess að búið er að ná eins góðum tökum á ástandinu og mögulegt er. Reykjalundur þjónustar viðkvæman hóp og því mikilvægt að sýna ítrustu varkárni til að tryggja sem best hag skjólstæðinga og allra annarra sem tengjast Reykjalundi." segir í tilkynningu.

Stjórnendur Reykjalundar fylgjast grannt með stöðu mála og bregðast við eftir þörfum. Nákvæmari upplýsingar verða gefnar út fyrir lok næstu viku og vonandi verður starfsemin komin aftur af stað mánudaginn 28. september.