Á hjarta-, lungna- og augnskurðdeild 12G á Landspítala hefur nú greinst COVID-19 smit hjá fjórum sjúklingum. Fram kemur í tilkynningu frá spítalanum að nú standi yfir rakning og skimun meðal sjúklinga, aðstandenda og starfsmanna en að ekki sé vitað á þessari stundu hvernig smitið barst inn á deildina. Deildin er lokuð fyrir innlögnum og heimsóknum.

Alls greindust yfir 200 smit um helgina og fram kemur í tilkynningu Landspítalans að 21 þeirra hafi haft tengsl við Landspítala.

Á Landspítala eru enn í gildi reglur um grímuskyldu og fjarlægðartakmörk ásamt persónulegum sóttvörnum. Ættingjar eru í tilkynningunni beðnir um að koma ekki á spítalann sýni þeir einkenni COVID-19 og grímuskylda gildir um þá.

Smitum hefur farið nokkuð fjölgandi í samfélaginu undanfarna daga og eru núna 757 með Covid í einangrun á landinu. Rúm 1.700 eru í sóttkví.