Í fyrra, árið 2021, fæddist fjórði fjölmennasti árgangurinn. Alls var fjöldi lifandi fæddra barna á Íslandi 4.879 sem er fjölgun frá árinu áður þegar 4.512 börn fæddust.

Fram kemur á vef Hagstofunnar sem birtu í dag nýjar tölur um fæðingar og fæðingartíðni að einungis þrisvar áður hafi fleiri lifandi fædd börn komið í heiminn á einu ári, árin 2009-2010, eftir hrun, og svo árið 1960.

Alls fæddust 2.576 drengir og 2.303 stúlkur í fyrra en það jafngildir 1.119 drengjum á móti hverjum 1.000 stúlkum. 36 prósent þeirra barna sem fæddust í fyrra eru búsett í Reykjavík, eða alls 1.770 börn. Í Kópavogi eru 542 börn og í Hafnarfirði 392 börn. Svipaður fjöldi var svo í Garðabæ, Reykjanesbæ og Akureyrarbæ, eða rúmlega 250.

Á vef Hagstofunnar segir að helsti mælikvarði á frjósemi er fjöldi lifandi fæddra barna á ævi hverrar konu. Yfirleitt er miðað við að frjósemi þurfi að vera um 2,1 barn til að viðhalda mannfjölda til lengri tíma litið. Árið 2021 var frjósemi íslenskra kvenna 1,82 börn á ævi hverrar konu og jókst hún frá árinu 2020 en þá var frjósemi 1,72.

Meðalaldur frumbyrja fer hækkandi

Meðalaldur mæðra hefur hækkað jafnt og þétt síðustu áratugi og núna er algengara að konur eignist sitt fyrsta barn nær þrítugu en tvítugu. Frá byrjun sjöunda áratugarins og fram yfir 1980 var meðalaldur frumbyrja undir 22 árum en eftir miðjan níunda áratuginn hefur meðalaldur farið hækkandi og var 28,6 ár í fyrra.

Frá árinu 1932 hefur aldursbundin fæðingartíðni alltaf verið hæst í aldurshópunum 20 til 24 ára og 25 til 29 ára en árið 2019 varð sú breyting að fæðingartíðnin reyndist hæst innan aldurshópsins 30 til 34 ára. Það sama átti við um árið 2020 en þá fæddust 113,1 börn á hverjar 1.000 konur á aldursbilinu 30 til 34 ára en 108,6 á aldursbilinu 25 til 29 ára.

En árið 2021 var aldursbundin fæðingartíðni aftur hæst í aldurshópnum 25 til 29 ára og fæddust þá 121 börn á hverjar 1.000 konur á því aldursbili.

Aldursbundin fæðingartíðni aldrei verið lægri á meðal mæðra undir tvítugu

Fæðingartíðni mæðra undir tvítugu var í fyrra 3,3 börn á hverjar 1.000 konur. Það er afar lágt í samanburði við tímabilið 1961 til 1965 þegar hún fór hæst en þá fæddust 84 börn á hverjar 1.000 konur undir tvítugu. Það þarf að fara aftur til ársins 1870 til að finna annað ár þar sem fæðingartíðni mæðra undir tvítugu fór undir fjögur börn á hverjar 1.000 konur.