„Myndböndin og myndirnar segja auðvitað smá en ekki alla söguna því ófærðin var gríðarleg. Þegar menn voru að vesenast í henni þá var auðvitað enginn að smella af,“ segir Þorsteinn Ægir Egilsson, formaður björgunarsveitarinnar Hafliða á Þórshöfn.

Fréttir af björgunarafreki sveitarinnar um helgina þar sem sjúklingi var komið frá Þórshöfn yfir Hófaskarð áleiðis til Akureyrar í ófærð og óveðri vöktu mikla athygli.

Þorsteinn segir heimamenn stundum kalla skarðið Skaflaskarð. Í ákveðnum áttum og veðrum skefur svo mikið í það svo það lokast.

„Staðsetningin á veginum er ekkert til að hrópa húrra fyrir,“ segir Þorsteinn og vekur athygli á að SAS-arar, eða snillingar að sunnan eins og heimamenn kalla þá, hafi haft merkilega mikla skoðun á staðsetningu vegarins.

„Það var ekki hlustað á heimamenn sem höfðu varað við þessu. Heimamenn sem þekkja svæðið eins og lófann á sér. Eins og við erum nú ánægðir með þessa leið þegar hún er fær getur leiðin verið mikill farartálmi á veturna.“

Útkallið kom um hálf tólf á laugardag og var sjúklingurinn kominn um borð í sjúkrabíl frá Húsavík fjórum tímum síðar. Þorsteinn segir vegalengdina 30 til 40 kílómetra.

„Sjúklingurinn var svo kominn á sjúkrahús á Akureyri um áttaleytið um kvöldið. Hann er að braggast og þetta endaði vel, sem gefur þessu gildi.“

Mynd sem sýnir ágætlega aðstæður. Björgunarsveitin var marga klukkutíma með aðeins 30-40 kílómetra.
Mynd/Björgunarsveitin Hafliði

Þorsteinn segir hundrað manns vera í sveitinni og fimmtíu á útkallslista. „Þegar útkall kemur með svona hætti og þessum forgangi er samtakamátturinn, liðsheildin og samvinnan milli aðila mjög mikil. Þarna komu saman Vegagerð­in, sjúkraflutningamenn, björg­unar­sveitin, þeir sem moka veginn og fleiri. Menn standa upp frá matarborðinu, fara í gallana og labba út.“

Í húsakynnum björgunarsveitarinnar sátu svo menn og miðluðu upplýsingum til þeirra sem fóru á heiðina. Sveitin er stórhuga til næstu ára og stefnt er að því að byggja nýja 350 fermetra aðstöðu.

„Það er mjög metnaðarfullt verkefni í gangi sem kostar peninga og vinnu,“ segir Þorsteinn. Sveitin sé á þremur stöðum í dag.

„Á einum stað erum við í 40 feta gámi og á öðrum erum við í húsi sem er til niðurrifs á aðalskipulagi. Það er ekki mikil framtíð.“

Þorsteinn segir ekki aðeins fjölskyldur sveitarmanna vera liðlegar. Vinnuveitendur séu það líka.

„Fólk er auðvitað að gefa sína vinnu og margir vinnuveitendur hér á svæðinu taka fólk ekki af launaskrá þegar það sinnir útköllum. Fyrir það erum við þakklát,“ segir formaðurinn.