Enn greinast daglega um 150–200 einstaklingar með Covid-19 hér á landi og að meðaltali eru tekin um þúsund sýni.

Í gær lágu þrettán sjúklingar með sjúkdóminn inni á Landspítala, þar af voru ellefu í einangrun og einn á gjörgæslu. 153 andlát vegna Covid höfðu á föstudaginn verið skráð hérlendis.

Þórólfur Guðnason sóttvarnalæknir segir stóran hluta þeirra sem greinast með Covid hér á landi ferðamenn eða fólk sem ekki er búsett hérlendis, suma daga fari hlutfall þeirra upp í 50 prósent þeirra sem greinast.

„Við vitum ekki nákvæmlega hvaða fólk þetta er en líklegast eru þetta mikið Bandaríkjamenn, sem eru mikil uppistaða í ferðamennsku hér og þeir hafa þurft að sýna fram á neikvætt próf við komuna heim en sú regla var þó afnumin þann 12. júní,“ segir Þórólfur.

Hann segir þó að hópurinn sem er að greinast með Covid nú sé fjölbreyttur en algengast sé að fólk sé að smitast í fyrsta sinn. „Við fylgjumst náið með endursmitum en þau eru sjaldgæf,“ segir Þórólfur og bætir við að um 20 prósent þeirra sem eru að greinast séu með BA5 afbrigðið sem greindist fyrst hér á landi í maí.

„Sem betur fer eru ekki margir að veikjast alvarlega þótt það einhverjir á spítala og einn á gjörgæslunni. Þetta er bara enn þá með okkur og faraldurinn er ekki búinn,“ segir Þórólfur.

Hann hvetur alla til að þiggja bóluefni og þá sem eru með undirliggjandi sjúkdóma eða hafa náð áttræðisaldri hvetur hann til að þiggja fjórðu sprautuna. „Sjúkdómurinn er klárlega miklu vægari hjá bólusettum en óbólusettum,“ segir Þórólfur.

„Læknar sem taka á móti þessum sjúklingum, sjá þá og fást við þá, segjast sjá greinilegan mun þarna á milli og það getur enginn greint það betur þó að einhverjir úti í bæ sem hafa aldrei komið nálægt Covid-sjúklingum hafi aðra skoðun á því,“ bætir Þórólfur við.

Samkvæmt tölum á vefsíðunni Covid.is, sem uppfærðar voru síðastliðinn föstudag, hafa 50,5 prósent íbúa landsins greinst með Covid-19. Tíðni endursmita er 2,2 prósent. Þórólfur segir að þrátt fyrir að hlutfall þeirra sem hafa smitast sé hátt sé mikilvægt að fólk sinni enn persónubundnum sóttvörnum.

„Ég held að við þurfum að minna fólk á að þetta sé ekki búið. Við hvetjum fólk sem er með Covid til að halda sig til hlés í fimm daga og vera ekki á meðal fólks til að minnka líkur á útbreiðslu og við hvetjum fólk til að gæta vel að sóttvarnaráðstöfunum sem við þekkjum svo vel,“ segir Þórólfur.