Fjögur ný innanlandssmit greindust á landinu í gær. Enginn greindist utan sóttkvíar. Fjórtán greindust þá við landamærin í þeim tíu vélum sem komu til landsins í gær.
Þetta staðfestir Jóhann K. Jóhannsson, samskiptastjóri almannavarna, við Fréttablaðið. Hann leggur þó áherslu á að tölurnar séu bráðabirgðatölur.
Lokað var í sýnatökur á föstudag og því komu nokkuð fleiri í sýnatökur í gær en á síðustu dögum. Óskar Reykdalsson, forstjóri Heilsugæslu höfuðborgarsvæðisins, segir að 1.165 sýni hafi verið tekin á Suðurlandsbrautinni. Hann hefur ekki tölur yfir fjölda sýna annars staðar á landinu en gerir þá ráð fyrir að heildarfjöldi þeirra á landinu öllu í gær hafi verið í kring um tvö þúsund sýni.
Bæði Jóhann og Óskar hljómuðu nokkuð jákvæðir fyrir lágum fjölda smita, en það hafði jafnvel verið óttast að fjöldinn yrði eitthvað meiri í dag en síðustu daga vegna þess að lokað var á sýnatökustöðum á nýársdag og þeir sem hefðu greinst þá ættu því að hafa greinst í gær.
