Samkvæmt fjáraukalögum, sem samþykkt þann 14. desember síðastliðinn, hækka rekstrarframlög til Þjóðkirkjunnar um 857 milljónir. Fjárfestingarframlög til umhverfismála lækka mest.

Alls hækka fjárheimildir til trúar- og dómsmála um ríflega 1,3 milljarða króna. Einkum fer hækkunin til trúmála, fjölskyldumála og útlendingamála. Útlendingastofnun fær heildarhækkun á fjárframlögum um tæpar 530 milljónir króna og eins og áður segir fær Þjóðkirkjan hækkun um tæpar 860 milljónir. Þá eru framlög til fæðingarorlofs hækkuð um tæpan milljarð.

Þá hækka framlög til samgöngumála um 569 milljónir, til fjölmiðla um 222 milljónir.

Sérhæfð sjúkrahúsþjónusta hækkar um 124 milljónir. Framlög til heilsugæslu, sjúkra-, iðju- og talþjálfun og sjúkraflutningar hækka öll samanlagt um 750 milljónir, en skorið er niður til sérfræðiþjónustu og hjúkrunar um 381,1 milljón.

Einkum er skorið niður í tveimur heildarliðum, umhverfismálum og málefnum framhaldsskóla. Framhaldsskólastigið fer á mis við 9 milljónir í fjáraukalögum, og framlög til umhverfismála lækka um 52 milljónir. Framlög til meðhöndlun úrgangs hækka um 80 milljónir, en fjárfestingar til varna gegn náttúruvá lækka um 132 milljónir.

Hér má kynna sér fjáraukalagafrumvarpið.