Lögreglan á höfuðborgarsvæðinu stóð fyrir aðgerðardögum í vikunni, en að þeim loknum höfðu um fimmtíu manns fengið stöðu sakbornings vegna ýmissa mála. Um er að ræða meint brot sem snúa meðal annars að vörslu og meðferð ávana- og fíkniefna, peningaþvætti, skjalafalsi, vopnalögum, hylmingu, þjófnaði og lögum um útlendinga. Þetta kemur fram í tilkynningu frá lögreglunni á höfuðborgarsvæðinu.
Auk þess stöðvaði lögregla kannabisræktanir í umdæminu og haldlagði nokkra tugi kílóa af kannabis auk fjölda kannabisplantna.
Þá kemur fram að lögregluaðgerðirnar voru haldnar að tilstuðlan Europol, en á sama tíma var ráðist í samskonar aðgerðir í öðrum löndum í Evrópu. Íslenska lögreglan hafi áður tekið þátt í slíkum aðgerðardögum, sem séu vel þekktir hjá Europol.
