Fimmtán ferðamenn sem dvalið hafa hér á landi hafa greinst með COVID-19 og eru nú í einangrun í Farsóttarhúsi. Þetta kom fram í hádegisfréttum RÚV.

Flest hinna smituðu eru bólusett. Veiran greindist í fólkinu við PCR-skimun fólkið fór í fyrir fyrirhugaða brottför af landinu.

Gylfi Þór Þorsteinsson, forstöðumaður Farsóttarhúsa segir óvíst hvar fólkið smitaðist, hér á landi eða fyrir komuna til landsins. En þar sem fólkið er bólusett hafi það ekki þurft að fara í skimun við komuna til landsins. „Þannig að það er ómögulegt að segja hvort þau hafi borið þessi smit með sér erlendis frá eða hvort þau séu að smitast hér,“ segir Gylfi við RÚV.

Gylfi þór segir að um 300 dvelji nú á þeim sóttkvíarhótelum sem enn eru opin, auk 28 sem dvelji í Farsóttarhúsi. Helmingur þeirra sé með COVID-19.

„Langflestir eru bólusettir. Þannig að bólusetningin, eins góð og hún er, þá er hún ekki 100% þannig að við þurfum að fara varlega áfram. Þetta er ekki alveg búið eins og sagt er,“ segir Gylfi við RÚV.

Um þau fimmtán sem eru með COVID segir Gylfi að nokkrir séu með engenni. „Þau eru með lítil einkenni, sem betur fer, en þó einhverjir með nokkur,“ segir Gylfi.

Hann segir fólkið hafa dvalið mislengi á landinu, frá nokkrum dögum upp í nokkrar vikur. Flest þeirra hafi ferðast talsvert um landið fyrir greiningu.