Almannavarnir hafa lýst yfir hertum aðgerðum á Vestfjörðum til að bregðast enn frekar við COVID-19. Leikskólum og grunnskólum á Suðureyri, Flateyri, Þingeyri og Súðavík verður lokað frá og með morgundeginum 6. apríl. Börn á forgangslistum fá vistun á leikskólum og 1. og 2. bekkjum grunnskóla.

Hert samkomubann verður einnig sett á þar sem miðað er við 5 manns. Það á þó ekki við fjölskyldur sem búa á sama heimili. Fjöldi viðskipta­vina í stærri versl­un­um (>150 fer­metr­ar) sé að há­marki 30 á hverj­um tíma.

Fólk er hvatt til þess að halda sig heima, halda samskiptafjarlægð, takmarka ferðir og fylgja leiðbeiningum yfirvalda. Þeim vinnu­stöðum eða hóp­um sem telja sig þurfa und­anþágu er bent á að sækja um slíkt hjá heil­brigðisráðuneyt­inu.

Aðgerðarstjórn almannavarna á Vestfjörðum tók þessa ákvörðun í samráði við sóttvarnarlækni og almannavarnadeild ríkislögreglustjóra og sendi frá sér tilkynningu í dag til fjölmiðla. Fimm ný smit komu upp síðastliðinn sólarhring sem tengdust öll norðanverðum Vestfjörðum. Smitrakning stendur nú yfir og beðið er niðurstöðu nokkurs fjölda sýna sem tekin hafa verið.

Hertar aðgerðir í Bolungarvík og Ísafirði eru enn í gildi. Rauði kross Íslands veitir fólki í sóttkví og einangrun aðstoð í síma 1717.