Landsréttur hefur staðfest úrskurð þess efnis að karlmaður, erlendur ferðamaður, skuli sæta farbanni hér vegna gruns um kynferðisbrot. Maðurinn er grunaður um að hafa brotið gegn konu á Akureyri í lok maí.

Fram kemur í úrskurði Landsréttar að maðurinn sé erlendur ríkisborgari með óskráðan dvalarstað á Akureyri og hafi engin bein tengsl við landið, hvorki atvinnu né fjölskyldutengsl. Því þyki hætta á að maðurinn muni fara af landi brott.

Lögreglan rannsakar meinta kynferðislega áreitni og nauðgun á skemmtistað á Akureyri. Vitni sögðu við lögreglu að stúlkan hafi komið hágrátandi niður á bar með fötin hálf niður um sig og sagt að maður hefði tekið niður um hana, farið með hana afsíðis og tekið getnaðarlim sinn út. Hún hafi náð að forða sér frá honum, farið niður að barnum, rætt við vitni og getað vísað á manninn. Maðurinn hafi séð að verið væri að benda á sig og reynt að hlaupa af vettvangi.

Atvikið átti sér stað á skemmtistað á Akureyri
Fréttablaðið/Pjetur

Konan skýrði lögreglu frá því að erlendur maður með derhúfu og skegg hafi dregið hana framhjá barnum, bakvið tjöld á efri hæðinni. Þar hafi hann byrjað að kyssa hana en hún reynt að snúa andliti sínu frá honum. Þá hafi hann dregið niður um sig buxurnar og reynt að komast ítrekað undir pilsið hennar. Þá hafi hann einnig reynt að fara inn í hana með getnaðarlim sinn en hún náð að ýta honum frá. Konan hafi sagt manninn hafa komið við kynfæri hennar þegar hann reyndi að setja getnaðarlim sinn inn í hana. Hún hafi að lokum náð að koma sér í burtu frá honum.

Maðurinn neitar sök en hann er í farbanni til 29. júní. Málið er til rannsóknar hjá lögreglustjóranum á Norðurlandi eystra en hún er á frumstigi.