Stjórn Félags íslenskra safna og safnmanna (FÍSOS) gerir alvarlegar athugasemdir við skipun nýs þjóðminjavarðar þann 26. ágúst síðastliðinn. Félagið sendi frá sér yfirlýsingu í dag.
„Ráðningar sem þessar, með tilfærslu á milli embætta, eru ógagnsæjar og ófaglegar. Slík vinnubrögð grafa undan trausti á stjórnsýsluna og embættismannakerfið,“ segir í yfirlýsingunni.
Lilja Dögg Alfreðsdóttir, menningar- og viðskiptaráðherra, skipaði í vikunni Hörpu Þórsdóttur, safnstjóra Listasafns Íslands, til að gegna embætti þjóðminjavarðar.
Skipað var í embættið án þess að það hafi verið auglýst og styðst ráðherra í þeim efnum við heimildir til að færa starfsmenn hjá ríkinu til í starfi án þess að auglýsa viðkomandi stöðu lausa til umsóknar.
„Með því að skipa í stöðu þjóðminjavarðar án auglýsingar er gert lítið úr mikilvægi safnsins, faglegri starfsemi þess og starfsfólki. Skipun sem þessi grefur undan faglegu umhverfi safna og lýsir metnaðarleysi stjórnsýslunnar í garð Þjóðminjasafnsins og málaflokksins í heild,“ segir í yfirlýsingunni.
„Stjórn FÍSOS leggur áherslu á að athugasemdir þessar beinast að engu leyti að nýskipuðum þjóðminjaverði, heldur að ógagnsæju og óréttlátu ferli skipunarinnar,“ segir einnig í yfirlýsingunni.
Yfirlýsinguna má lesa í heild sinni hér að neðan:
Stjórn Félags íslenskra safna og safnmanna (FÍSOS) gerir alvarlegar athugasemdir við skipun nýs þjóðminjavarðar þann 26. ágúst síðastliðinn. Ráðningar sem þessar, með tilfærslu á milli embætta, eru ógagnsæjar og ófaglegar. Slík vinnubrögð grafa undan trausti á stjórnsýsluna og embættismannakerfið.
Þjóðminjasafn Íslands er höfuðsafn á sviði þjóðminjavörslu og ber sem slíkt höfuðábyrgð á að varðveita, rannsaka og miðla stórum hluta íslensks menningararfs. Safnið hefur verið leiðandi í faglegu starfi safna hér á landi í allri sinni starfsemi. Með því að skipa í stöðu þjóðminjavarðar án auglýsingar er gert lítið úr mikilvægi safnsins, faglegri starfsemi þess og starfsfólki. Skipun sem þessi grefur undan faglegu umhverfi safna og lýsir metnaðarleysi stjórnsýslunnar í garð Þjóðminjasafnsins og málaflokksins í heild.
Stjórn FÍSOS leggur áherslu á að athugasemdir þessar beinast að engu leyti að nýskipuðum þjóðminjaverði, heldur að ógagnsæju og óréttlátu ferli skipunarinnar.
Virðingarfyllst,
Stjórn FÍSOS
