Félag fréttamanna lýsir yfir stuðningi við kjarabaráttu Blaðamannafélags Íslands. Í yfirlýsingu segir félagið að þau styðji „heilshugar verkfallsaðgerðir Blaðamannafélagsins“ og að þau treysti því að ritstjórar og eigendur fjölmiðla virði lögboðin verkföll þeirra.

„Laun blaðamanna á Íslandi eru almennt langt frá því að vera í samræmi við vinnutíma, álag í starfi og þá ábyrgð sem blaðamenn bera,“ segir í yfirlýsingunni.

Þar segir jafnframt að fjölmiðlar gegni grundvallarhlutverki í lýðræðissamfélagi í því að upplýsa almenning um það sem gerist í samfélaginu og veita ráðandi öflum aðhald.

„Það geta þeir varla gert ef hæfir fréttamenn hrekjast úr starfinu vegna lágra launa, líkt og gerist trekk í trekk. Það er kominn tími til að störf blaðamanna verði metin að verðleikum,“ segir að lokum.

Undir yfirlýsinguna ritar Alma Ómarsdóttir en hún er formaður félagsins. Félag fréttamanna er aðildarfélag BHM og er stéttarfélag fréttamanna sem starfa á Ríkisútvarpinu.