Félag fréttamanna gagnrýnir í yfirlýsingu niðurskurð sem fréttastofa RÚV stendur nú frammi fyrir. Alls hefur þremur fréttamönnum verið sagt upp auk þess sem að um áramót verðu starfshlutfall nokkurra skert og samningjar ekki framlengdir við einhverja fréttamenn. Það séu alls níu stöðugildi sem samsvari um fimmtungi fréttamanna á fréttastofunni.

„Á sama tíma og neyðarástand ríkir í́ samfélaginu og aukin krafa er gerð um stöðugar og traustar fréttir þá skýtur skökku við að skorið sé niður á fréttastofunni. Það gefur auga leið að fækkun um níu stöðugildi rýrir gæði og vinnslu frétta. Þegar dregið er úr getu fjölmiðla til að stunda gagnrýna blaðamennsku er hætta á að aðgengi almennings að nákvæmum og greinargóðum upplýsingum skerðist. Þetta er sérstaklega hættulegt á tímum upplýsingaóreiðu,“ segir í yfirlýsingu félagsins, sem er félag fréttamanna sem starfa á RÚV.

Í yfirlýsingunni segir enn fremur að RÚV sé hluti af almannavarnakerfinu og sé eina stofnunin sem hafi ekki fengið aukin fjárútgjöld vegna COVID-19, heldur hafi verið skorið niður til þeirra. Þau telja það furðulegt að það bitni á fréttastofunni „á sama tíma og störf hennar hafa sjaldan verið jafn mikilvæg í samfélaginu“.

Viðræður um vangoldin laun

Þau harma uppsagnir vandaðra fréttamanna og telja þar starfsmann með mikla reynslu, eða aldarfjórðung. Þau segja það sérstaklega gagnrýnisvert að þeim starfsmanni, sem hafi einnig átt í viðræðum við yfirstjórn vegna vangoldinna launa, hafi verið sagt upp áður en það mál var klárað.

„Félag fréttamanna skorar á yfirstjórn RÚV að endurskoða boðaðan niðurskurð á fréttastofunni og skorar á stjórnvöld að sjá til þess að geta RÚV til að sinna almannavarnahlutverki sínu verði ekki skert,“ segir að lokum í yfirlýsingunni.

Hana má lesa í heild sinni hér að neðan.

Yfirlýsing Félags fréttamanna

Félag fréttamanna gagnrýnir þann niðurskurð sem fréttastofa RÚV stendur nú frammi fyrir. Á sama tíma og neyðarástand ríkir í samfélaginu og aukin krafa er gerð um stöðugar og traustar fréttir þá skýtur skökku við að skorið sé niður á fréttastofunni. Það gefur auga leið að fækkun um níu stöðugildi rýrir gæði og vinnslu frétta. Þegar dregið er úr getu fjölmiðla til að stunda gagnrýna blaðamennsku er hætta á að aðgengi almennings að nákvæmum og greinargóðum upplýsingum skerðist. Þetta er sérstaklega hættulegt á tímum upplýsingaóreiðu.

RÚV er hluti af almannavarnakerfinu en er þar eina stofnunin þar sem ekki er veitt meira fé til rekstursins vegna áhrifa kórónuveirufaraldursins, heldur er þvert á móti skorið niður í framlögum til stofnunarinnar. Þá telur Félag fréttamanna sæta furðu að yfirstjórn RÚV láti þann niðurskurð bitna á fréttastofunni, á sama tíma og störf hennar hafa sjaldan verið jafn mikilvæg í samfélaginu.

Uppsagnir þriggja fréttamanna hafa þegar tekið gildi. Um áramótin verður starfshlutfall nokkurra skert og samningar við aðra ekki framlengdir, þannig að allt í allt tapast níu stöðugildi, eða tæplega fimmtungur fréttamanna á fréttastofunni. Félag fréttamanna harmar uppsagnir vandaðra fréttamanna, þar á meðal starfsmanns með rúmlega aldarfjórðungs starfsaldur hjá stofnuninni. Sá hefur átt í viðræðum við yfirstjórn RÚV vegna vangoldinna yfirvinnugreiðslna, sem hann sannarlega hefur átt rétt á. Félagið setur spurningamerki við að starfsmaður sem barist hefur fyrir réttmætum kjörum sínum fái uppsagnarbréf áður en það mál er til lykta leitt.

Félag fréttamanna skorar á yfirstjórn RÚV að endurskoða boðaðan niðurskurð á fréttastofunni og skorar á stjórnvöld að sjá til þess að geta RÚV til að sinna almannavarnahlutverki sínu verði ekki skert.