Joe Biden, forseti Bandaríkjanna, taldi ríka ástæðu til að senda forstjóra bandarísku leyniþjónustunnar, Bill Burns, á fund Volodímír Selenskí Úkraínuforseta nokkrum vikum áður en Rússar réðust inn í landið.
CIA hafði fengið veður af því að Rússar ætluðu sér að ráða Selenskí af dögum og var Selenskí varaður við þessum áætlunum á fundinum.
Þetta er meðal þess sem kemur fram í nýrri bók, The Fight of His Life: Inside Joe Biden‘s White House, eftir Chris Whipple sem kemur út í dag.
Fundurinn fór fram í janúar á síðasta ári, eða um það leyti sem Rússar sendu skriðdreka sína að landamærunum og bjuggu sig undir innrás.
Í bókinni er því haldið fram að Selenskí hafi trúað því að aðeins væri um að ræða hótanir frá Rússum og þeir myndu ekki ráðast inn í landið. Honum hafi verið mjög brugðið þegar CIA sagðist hafa trúverðugar upplýsingar um að Rússar væru á eftir honum.
Rússar réðust inn í landið nokkrum vikum síðar og hefur stríð, með tilheyrandi manntjóni, eyðileggingu og hörmungum, nú staðið yfir í tæpt ár.
Í bók sinni segir Whipple að ábendingar CIA hafi komið Selenskí að góðum notum. Rússar hafi sýnt honum banatilræði í tvígang en Selenskí í bæði skiptin verið skrefinu á undan.
