Bandaríska alríkislögreglan, FBI, er þessa stundina að gera húsleit á heimili Joe Biden Bandaríkjaforseta við Rehoboth-strönd í Delaware-ríki. Leitin er hluti af rannsókn á meðhöndlun leynilegra skjala.
FBI hefur ekki tjáð sig um málið, en lögmaður Biden hefur greint frá því að leitin sé skipulögð og hafi verið gerð með samþykki forsetans. Því hafi ekki þurft leitarheimild.
Húsleitin er ein af mörgum leitum sem alríkislögreglan hefur farið í undanfarið, víða um Bandaríkin. Það gerðist í kjölfar þess að leynileg skjöl fundust á skrifstofu Biden í höfuðborginni Washington DC í nóvember.
Síðan fundust fleiri leynileg skjöl á öðru heimili Biden í Wilmington í Delaware-fylki.
Biden hefur haldið því fram að hann og hans teymi hafi brugðist rétt við rannsókninni og sýni samstarfsvilja.
