Hátíðin sem var haldin í fyrsta sinn í fyrra vex um 230 prósent á milli ára en yfir sjötíu viðburðir eru nú á dagskrá. Um er að ræða svokallaða þátttökuhátíð þar sem sviðsljósinu er beint að nýsköpun á Íslandi í sinni breiðustu mynd og að sögn stjórnenda er markmiðið að auka sýnileika nýsköpunar þvert á atvinnugreinar. Eins vilja þau auka aðgengi og hvetja almenning til þáttöku í nýsköpun og er því almenningur hvattur til að sækja viðburði hátíðarinnar sér að kostnaðarlausu.


Hátíð um allan bæ


Melkorka Sigríður Magnúsdóttir er ein þriggja stofnenda hátíðarinnar.


„Við erum þrír stofnendur en við höfum öll verið að vinna í umhverfi sprota- og nýsköpunar hér á landi. Okkur fannst þetta vanta en svona stórar nýsköpunar og tækniráðstefnur eru haldnar árlega alls staðar í kringum okkur. Okkar fyrirmynd er í rauninni Oslo Innovation Week og okkur fannst tími kominn til að setja Ísland á sama stall,“ segir Melkorka og bætir við að stjórnendur finni strax mikinn áhuga frá hinum Norðurlöndunum.

Melkorka Sigríður Magnúsdóttir er ein þriggja stofnenda hátíðarinnar. Mynd/Saga Sig

„Við höfum fengið mikið að fyrirspurnum og höfum nú þegar myndað sterkt tengslanet með þessum ráðstefnum í kringum okkur,“ segir hún og bindur vonir við að hátíðin stækki frá ári til árs; „Okkar draumur er að við séum þessi alþjóðlegi markaðsgluggi íslenskrar nýsköpunar út á við.“

Fyrsta hátíðin var skyndilega færð úr raunheimum í netheima þegar samkomutakmarkanir voru hertar í fyrra.

„Við þurftum þá að beita nýsköpunarhugsun og færa alla viðburði yfir í streymi um leið. Nú er um helmingur viðburða í streymi. Við viljum þó líka að fólk hittist og kynnist og við gætum þá ítrustu sóttvarna.“

Melkorka segir hátíðina byggja á því að fyrirtæki, stofnanir og frumkvöðlar leggi til viðburði og þannig einskorðist hátíðin ekki við einn stað heldur fer hún fram úti um allan bæ.

„Að því sögðu þá erum við með heimili fyrir heimilislausa viðburði hér í Grósku, í Vísindagörðum, heimili nýsköpunnar,“ útskýrir hún.


Allt frá þörungum að vináttuvél


Eins og fyrr segir eru yfir sjötíu viðburðir á dagskrá þar sem fyrirtæki og frumkvöðlum gefst kostur á að standa fyrir nýsköpunartengdum viðburðum þar sem spennandi sóknarfæri og frjóar hugmyndir geta sprottið upp. Hér má sjá nokkur dæmi um áhugaverða viðburði, allt frá salti og þörungum yfir í tölvuleiki og vináttu. ■

Eimur ætlar að fjalla um möguleika tengda vetni sem orkugjafa og þörungum sem matvæli og bjóða upp á tilraunarstarfsemi í beinni, þar sem landliðskokkur reiðir fram dýrindis þörunga.

EIMUR - Tilraun um þörunga og vetni

Streymi 31. maí klukkan 10:00-11:00

Eimur, samstarfsverkefni Landsvirkunar, Norðurorku, Orkuveitu Húsavíkur og Samtaka sveitarfélaga og atvinnuþróunar á Norðurlandi eystra, ætlar að fjalla um möguleika tengda vetni sem orkugjafa og þörungum sem matvæli, en upp á síðkastið hefur mikið verið rætt um nýmælið í þessu tvennu.

Boðið verður upp á tilraunarstarfsemi í beinni, þar sem landliðskokkur reiðir fram dýrindis þörunga og vísindamaðurinn Ottó Elíssson fræðir gesti um kraftinn sem býr í vatninu.

Fulltrúar Háskóla Íslands og CCP opna nýtt netnámskeið um vináttu á tímum vaxandi tölvuleikjaspilunar og spyrja til dæmis hvort hægt sé að hanna vináttu. Mynd/Aðsend

CCP og Háskóli Íslands - Vináttuvélin

Streymi 26. maí klukkan 17:00-18:00

Fulltrúar Háskóla Íslands og CCP opna nýtt netnámskeið um vináttu á tímum vaxandi tölvuleikjaspilunar þann 26. maí. Viðburðurinn verður í streymi.

Er hægt að hanna vináttu? Hefur vinátta sem verður til á netinu sömu þýðingu og sú sem verður til í raunheimum? Hvaða hlutverki gegna tölvuleikir í myndun nýrra vinasambanda þvert á heimsálfur? Hver eru heilsufarslega áhrif þess að vera einmana og hvaða hlutverki gegna tölvuleikir í að rjúfa einagrun fólks?

Saltverk býður fólki til að koma í „happy hour“ og spjall um sögu fyrirtækisins frá hugmynd að saltgerð á Íslandi til dagsins í dag.

Saltverk - Fræ sem urðu af nýjum sprotum

Saltverk Nýbýlavegur 4, fimmtudagur 27. maí klukkan 17:00-19:00

Saltverk býður fólki til að koma í „happy hour“ og spjall um sögu fyrirtækisins frá hugmynd að saltgerð á Íslandi til dagsins í dag og hugmynda af nýjum sprotum sem spruttu á leiðinni og eru allir innan skrifstofu Saltverks.

Höfuðstöðvar Saltverks geyma þrjá aðra sprota sem allir spruttu úr hugmyndafræði Saltverks yfir árin. Angan Skincare sem eru sjálfbærar húðvörur sem upphaflega voru unnar úr affalls magnesíum salti. Skál! sem er náttúruvínsbar og veitingastaður á Hlemmi Mathöll og síðan Rætur & Vín sem sérhæfir sig í innflutningi á náttúruvínum.

Feed The Viking býður upp á frumkvöðlasjósund í Nauthólsvík og heita íslenska kjötsúpu og í veganútgáfu þegar komið er upp úr.

Feed the Viking - Smakk á bakka og frumkvöðlasjósund

Nauthólsvík 28. maí klukkan 8:00-10:00

Feed The Viking er nýsköpunarfyrirtæki á matvælasviðinu sem hóf árið 2016 að bjóða upp á íslenskt kjöt- og fisk „jerky“ og framleiðir nú ýmis konar þurrfrysta rétti til sölu um allan heim, með áherslu á íslenska matvælaarfleifð.

Fyrirtækið býður upp á frumkvöðlasjósund í Nauthólsvík og heita íslenska kjötsúpu og í veganútgáfu þegar komið er upp úr.

Íslandsbanki býður gestum Nýsköpunarvikunnar að hlýða á reynslusögur frá fyrrum styrkþegum Frumkvöðlasjóðs Íslandsbanka.

Íslandsbanki - Reynslusögur frá styrkþegum

Streymi 27. maí 10:00-11:00

Íslandsbanki býður gestum Nýsköpunarvikunnar að hlýða á reynslusögur frá fyrrum styrkþegum Frumkvöðlasjóðs Íslandsbanka.

Styrkþegar segja frá sínum verkefnum, hvar þau eru stödd í dag og hvernig styrkurinn hjálpaði þeim til að taka sín verkefni áfram. Í upphafi fundar verður stutt kynning á Frumkvöðlasjóði Íslandsbanka sem gagnast sérstaklega þeim sem hafa áhuga á að sækja um styrk úr sjóðnum.

‍Á fundinum verða erindi frá: - Garðari Finnssyni, stofnanda Plastgarða, Sigríði Bylgju, stofnanda Trés lífsins, Rögnu Söru, stofnanda Fólks og Chanel Björk höfundur Hennar raddar