Ásmundur Einar Daðason, skóla og barnamálaráðherra er sá ráðherra sem nýtur mests trausts meðal landsmanna. Fæstir treysta Jóni Gunnarssyni dómsmálaráðherra. Þetta er meðal þess sem fram kemur í könnun MMR á trausti til ráðherra í ríkisstjórn Íslands.
Alls sögðust 61 prósent svarenda treysta Ásmundi Einari frekar eða mjög mikið. Einungis 16 prósent sögðust treysta Jóni og 46 prósent kváðust treysta honum frekar eða mjög lítið. Helmingur stuðningsfólks Vinstri-grænna, þriðjungur stuðningsfólks Framsóknar og fjórðungur stuðningsfólks Sjálfstæðisflokksins sagðist bera frekar eða mjög lítið traust til dómsmálaráðherrans.
Nokkurn mun má sjá á trausti til ráðherra eftir flokkslínum, ráðherrar Framsóknarflokksins njóta meira trausts og minna vantrausts en aðrir ráðherrar, að forsætisráðherra undanskildum.
Vantraust til ráðherra Sjálfstæðisflokksins mældist meira en til ráðherra annarra flokka.
Séu niðurstöðurnar skoðaðar eftir kyni svarenda kemur í ljós að karlmenn reyndust líklegri til að segjast bera mjög eða frekar mikið traust til Sigurðar Inga Jóhannssonar (56 prósent) og Willum Þórs Þórssonar (53 prósent) heldur en konur. Alls sögðust 49 prósent kvenna treysta Sigurði Inga og 34 prósent Willum Þór. Konur voru öllu líklegri en karlar til að lýsa trausti til Katrínar Jakobsdóttur, 64 prósent á móti 57 prósent.
Traust til ráðherra reyndist almennt hærra hjá þeim sem eldri eru. Mátti greina aukið traust til Ásmundar Einars Daðasonar, Sigurðar Inga og Willum Þórs því eldri sem þátttakendur voru. Þá reyndust svarendur 68 ára og eldri líklegri til að lýsa trausti til Katrínar Jakobsdóttur en lítill munur reyndist á trausti til Lilju Alfreðsdóttur eftir aldri.
Í úrtaki könnunarinnar voru einstaklingar 18 ára og eldri valdir handahófskennt úr hópi álitsgjafa MMR. Könnunin var framkvæmd dagana 29. nóvember til 2. desember og tóku 933 manns þátt.
