Sam­tökin Solaris vinna nú að því að safna fjár­magni til að gefa börnum á flótta vetrar­gjöf.

„Fyrir nokkrum árum var alltaf haldið friðar- og ná­granna­boð í desember þar sem öllu flótta­fólki var boðið og okkar fram­lag þar var að færa þeim vetrar­gjafir,“ segir Sema Erla Serdar fram­kvæmda­stýra og stofnandi Solaris.

Hún segir að boðin hafi dottið niður fyrir í desember en að þau hafi á­kveðið að halda þessari hefð á­fram.

Á þessu ári eru hátt í 300 börn á landinu sem bíða úr­lausnar mála sinna í hælis­kerfinu og verða gjafirnar fyrir þau. Sema segir að þegar þau byrjuðu á þessu fyrir fjórum eða fimm árum hafi þau safnað fyrir færri en 100 börn, það hafi svo verið 200 í fyrra og sé að nálgast 300 núna.

„Það er að bætast við á meðan við erum að safna, bara á milli daga. Það hefur aldrei verið svona mikill fjöldi,“ segir Sema en innan þessa hóps eru til dæmis ekki börn sem koma frá Úkraínu því þau fara ekki inn í hælis­kerfið nema í svo stuttan tíma.

Sjá einnig
Vill ekki að lög­reglan komi og taki sig

Sema segir að þeim þyki best að fá fjár­stuðning frá fólki og að nýta þann pening sem safnast í að kaupa gjafir því mikil á­hersla er lögð á að allir fái eins.

„Það er skipt eftir aldri og allir í sama aldurs­flokki fá sama pakka,“ segir Sema og að sem dæmi hafi verið í fyrra bækur fyrir 3 til 10 ára og gjafa­kort fyrir þau yngstu. Annað sem hefur verið gefið eru bangsar, pipar­kökur og glass­úr og margt fleira.

„Stjórn Solaris bætir við gjöfina í ár Bónuskorti því við erum að finna fyrir mikilli þörf. Fólk er í mikilli neyð og á ekki nóg fyrir sínum grunn­þörfum,“ segir Sema.

Hún segir að þau hafi byrjað að finna fyrir þessari auknu þörf í heims­far­aldri Co­vid og þá sér­stak­lega hjá fólki í hælis­kerfinu en að þau finni líka fyrir henni núna hjá fólki sem hefur fengið vernd.

Hægt er að styrkja verk­efnið með því að leggja inn á sam­tökin en upp­lýsingarnar má finna hér að neðan.

„Við stefnum á að dreifa á allra næstu dögum en ef fólk styrkir eftir það þá fer sá peningur bara í verk­efni næsta árs,“ segir Sema Erla.

Hægt er að leggja inn á reikning samtakanna (RN: 515-26-600217. KT: 600217-0380) eða styrkja með aur (123 7919151) og merkja færsluna W22