Dómstóll í Utah í Bandaríkjunum hefur dæmt bandaríska ríkið til að greiða Ludovic Michaud 9,5 milljónir Bandaríkjadala í bætur, 1,3 milljarða króna, vegna slyss sem varð eiginkonu hans að bana.
Ludovic var á ferð með eiginkonu sinni, Esther Nakajigo, í Arches-þjóðgarðinum í Utah í júní 2020. Á leiðinni út úr þjóðgarðinum óku þau í gegnum hlið sem ekki var tryggilega fest.
Í frétt NBC kemur fram að um það leyti sem þau óku í gegnum hliðið hafi vindhviða feykt því til hliðar með þeim afleiðingum að það lenti á bifreiðinni og á höfði Estherar þar sem hún sat við hlið eiginmanns síns. Var hún úrskurðuð látin samstundis.
Ludovic fær 9,5 milljónir Bandaríkjadala í bætur, móðir Estherar fær 700 þúsund dali og faðir hennar fær 350 þúsund dali vegna slyssins.
Bandaríska ríkið viðurkenndi sök í málinu, en í stefnu aðstandenda konunnar kom fram að hægt hefði verið að koma í veg fyrir slysið ef venjulegur hengilás hefði verið á hliðinu.
Fjölskyldan fór upphaflega fram á 140 milljónir dala í bætur með þeim rökum að Esther, sem var sjónvarpskona og mannréttindafrömuður í Úganda, hefði að líkindum þénað þá upphæð á starfsævi sinni.
Fyrir dómi kom fram að Ludovic þjáðist enn af áfallastreituröskun eftir slysið og markmið hans með málsókninni væri að koma í veg fyrir að slys af þessu tagi gæti endurtekið sig.
