Demókratar fá aldrei að sjá skattskýrslur Donalds Trump, forseta Bandaríkjanna. Þetta segir Mick Mulvaney, starfsmannastjóri Hvíta hússins í samtali við Fox fréttastofuna í dag.

„Það er ekki að fara að gerast og þau vita það,“ sagði Mulvaney. Sagði hann kjósendur hafa verið vel meðvitaða um að forsetinn myndi ekki opinbera skýrslurnar, en kosið hann samt sem áður.

Richard Neal, þingmaður demókrata og einn þriggja þingmanna fulltrúadeildarinnar sem hafa heimild til þess að óska eftir skattskýrslum, lagði fram formlega beiðni um aðgang að skattaskýrslum forsetans sex ár aftur í tímann. Sagði Mulvaney að um væri að ræða pólitískt ráðabrugg í boði demókrata og hafnaði alfarið tilraunum fulltrúadeildarinnar til þess að nálgast skýrslurnar. Löng hefð er fyrir því að forsetar opinberi framtöl sín en Trump er eini forseti síðari ára sem ekki hefur opinberað upplýsingarnar.

William Consovoy, lögfræðingur í lögfræðiteymi Trumps, sagði í gær að forsetinn ætti rétt á því að halda framtali sínu leyndu og að óskir Demókrata um að hann opinberaði framtölin væri „á­reiti“ .

Trump hefur áður sagt að hann geti ekki opin­berað upp­lýsingarnar þar sem að þær séu til skoðunar hjá skatta­yfir­völdum í Banda­ríkjunum. Um­rædd stofnun hefur þó sagt að hægt sé að opin­bera þær þrátt fyrir að þær séu til skoðunar.
For­setinn tjáði sig á dögunum um beiðni nefndarinnar á Twitter og sagði hann við til­efnið að ekkert sem demó­kratar myndu fá að sjá myndi nokkurn­tímann gera þá á­nægða. „Þetta er hæsta stig á­reitis á for­seta í sögu landsins okkar!“