Félag ungra Sjálfstæðismanna í Vestmannaeyjum skorar á Alþingismenn að fá sjúkraþyrlu staðsetta í Eyjum. Félagsmenn segja að nú sé fullkominn tími til að láta verkin tala.

„Eyverjar hvetja Alþingismenn til að hætta að mæta bara í kaffi og halda tilgangslausa fundi og fara að girða sig í brók. Vestmannaeyjar eru stór hluti af Suðurkjördæmi og reiknum við því með að okkar atkvæði muni skipta máli í komandi alþingiskosningum,“ segir í áskorun Eyverja sem birtist á vef þeirra í gær.

„Við erum eyja og sérstaða okkar því mikil. Hér eru oft vond veður og þegar mannslíf eru í húfi skiptir hver mínúta máli,“ segir í yfirlýsingunni.

Óléttar konur finni fyrir óöryggi

Eyverjar segjast finna fyrir því að ungt fólk sem langar að flytja til Eyja setji það fyrir sig að þar hafi verið skorið mikið niður í heilbrigðisþjónustu og að biðtími eftir sjúkraflugi sé óásættanlegur.

„Óléttar konur finna fyrir óöryggi ef að eitthvað kemur upp á sem og langveikir og aldraðir sem treysta sér ekki í ferðalög til að sækja sérfræðiþjónustu. Við skorum því á ykkur að gera þetta að forgangsmáli og nýta orkuna í annað en kaffispjall og Facebook statusa.“

Aðalfundur Eyverja var haldinn í fyrradag þar sem kosið var um nýja stjórn. Ragnheiður Perla Hjaltadóttir var endurkjörin formaður og Borgþór Eydal Arnsteinsson var kjörinn varaformaður.

„Góðar umræður voru á fundinum og stefnir í frábært Eyverjaár,“ segir í færslu Eyverja á Facebook.