Eyjólfur Ármannsson skipar efsta sæti hjá Flokki fólksins í Norðvesturkjördæmi fyrir komandi alþingiskosningar segir í fréttatilkynningu flokksins.

Eyjólfur er lögfræðingur að mennt, með meistarapróf í lögfræði frá HÍ og LL.M. frá University of Pennsylvania. Á ferli sínum hefur hann starfað sem lögfræðingur á Íslandi og í Noregi fyrir Fjármálaráðuneytið, Isavia, Nordea og DNB. Eyjólfur hefur undanfarið gætt hagsmuna landeigenda í Arnarfirði og Dýrafirði í þjóðlendumálum, sem eru til meðferðar hjá Óbyggðanefnd.

Hann er alinn upp í Vestmannaeyjum, en ættaður úr Lokinhamradal í Arnarfirði þar sem hann var tíðum í sveit sem ungur maður.

Eyjólfur er formaður Orkunnar okkar, samtaka þeirra sem vilja standa vörð um sjálfsákvörðunarrétt Íslands í orkumálum. Hann er einn aðalhöfunda sérfræðingaskýrslu samtakanna, Áhrif inngöngu Íslands í orkusamband ESB.

Flokkur fólksins mælist í júní með 5,5 prósent fylgi, en mældist með 2,8 prósent fylgi í könnun þar á undan. Flokkurinn hefur því bætt við sig þremur prósentu­stigum.