Eva Ollikainen hefur verið ráðinn nýr aðalhljómsveitarstjóri Sinfóníuhljómsveitar Íslands 2020 - 2024. Hún verður fyrsta konan til að gegna starfi aðalhljómsveitarstjóra Sinfóníunnar. Ollikainen nam hljómsveitarstjórn hjá Jorma Panula og Leif Segerstam í Sibeliusar-akademíunni. Hún hreppti fyrstu verðlaun í Panula-keppninni fyrir unga hljómsveitarstjóra árið 2003 og var um skeið aðstoðarstjórnandi hjá Kurt Masur og Christoph von Dohnányi, segir í tilkynningu SÍ.

Ollikainen mun stjórna hljómsveitinni að jafnaði í átta vikur á hverju starfsári. Auk þess mun hún stýra hljómsveitinni á fyrirhuguðum tónleikaferðum innanlands sem utan. Hún stjórnaði hljómsveitinni þrisvar á áskriftartónleikum á árunum 2007–10, og nú síðast tvennum tónleikum í Hörpu 2019.

"Ég hef fundið til djúprar tengingar við meðlimi Sinfóníuhljómsveitar Íslands frá því ég stjórnaði henni í fyrsta sinn. Þeir eru ekki aðeins hljóðfæraleikarar á hæsta alþjóðlega plani, heldur er skilningur þeirra og miðlun á tónlistinni einstök,“ segir Eva Ollikainen. „Ég hlakka mjög til samstarfs okkar í nýrri og gamalli tónlist, og er viss um að við munum eiga eftirminnilegar stundir með hinum frábæru íslensku áheyrendum. Mig langar að halda áfram hinu lofsverða starfi hljómsveitarinnar hvað varðar fjölbreytni í verkefnavali og mun ganga enn lengra í þá átt, til dæmis með því að láta verk tónskálda með ólíkan bakgrunn hljóma. Ég hlakka einnig mjög til að starfa með faglegu starfsliði hljómsveitarinnar, en ég varð strax mjög hrifin af orku þeirra og þeirri ákefð sem þau sýna við það að gera Sinfóníuhljómsveit Íslands enn betri."

Lára Sóley Jóhannsdóttir sem tekur formlega við starfi framkvæmdarstjóra Sinfóníuhljómsveitar Íslands 1. ágúst n.k. segir í tilkynningu: "Við erum einstaklega stolt og glöð yfir því að hafa ráðið Evu Ollikainen sem nýjan aðalhljómsveitarstjóra og listrænan stjórnanda hljómsveitarinnar. Eva hefur í gegnum starf sitt með hljómsveitinni á liðnum árum náð góðu sambandi bæði við hljóðfæraleikara og áheyrendur með sinni hrífandi orku og eldmóði. Hún skilur hversu mikilvæg hljómsveitin er okkar samfélagi og hvernig samtalið við þjóðina getur eflst enn frekar. Hún hefur allt sem þarf til þess að halda áfram að þróa listræn gæði og gera okkur mögulegt að flytja hágæða tónlist hérlendis sem erlendis."

Fyrir skömmu stjórnaði Ollikainen í fyrsta sinn Fílharmóníusveitinni í Helsinki, í Níundu sinfóníu Beethovens, og nýrri uppfærslu af Turandot eftir Puccini í Dönsku óperunni. Þá stjórnar hún á næstunni Beethoven-hring með Jönköping Sinfonietta og ballettunum Hnotubrjótnum og Svanavatninu við Semperoper í Dresden.

Yann Pascal Tortelier lætur af störfum sem aðalhljómsveitarstjóri Sinfóníunnar en hann var ráðinn frá 2016 - 2019. Áformað var að hann stjórnaði síðustu tónleikunum sem aðalhljómsveitarstjóri þegar Ari Þór Vilhjálmsson og Sigurgeir Agnarsson léku konsert fyrir fiðlu og selló eftir Brahms í maí síðastliðinn en hann forfallaðist vegna veikinda. Bjarni Frímann Bjarnason, aðstoðarhljómsveitarstjóri hljóp þá í skarðið.