Karl Gauti Hjaltason, fyrrverandi þingmaður Flokks fólksins, segir að fjölmiðlar hafi ranglega eignað sér setningu upp úr upptöku af Klaustur bar. Þar vísar Karl í fréttir þess efnis að hann hafi kallað Eygló Harðardóttur, fyrrverandi ráðherra, „galna kerlingarklessu.“ Þetta kemur fram í tilkynningu frá þingmanninum.

Sjá einnig: Kallaði Eygló Harðardóttur „galna kerlingarklessu“

Í tilkynningunni segir meðal annars að Karl hafi hlustað á upptökuna og ekki kannast við að um væri að ræða sína rödd.

„Fjölmiðlar hafa að ranglega eignað mér setningu úr upptökunni sem svo mjög hefur verið í fréttum að undanförnu. Upptakan er afar óskýr en það vefst samt ekki fyrir fjölmiðlum að greina annars vegar hvað er sagt og hins vegar hver talaði. Sjálfur get ég hvorugt eftir að hafa marghlustað á þetta brot úr upptökunni. Ég þekki hins vegar mitt orðfæri og mína rödd. Þessi orð voru ekki mín og sú rödd sem talar er það ekki heldur.“

Karl segir þá að þó ekki sé hægt að gera athugasemdir við að fjölmiðlar birti efni upp úr upptöku af þessu tagi þar sem hún sé til „að þá sé það mikilvægt að þeir nálgist slíka endursögn af varfærni og lágmarkskrafa er að þeir viti nákvæmlega hver sagði hvað þegar þeir velja sér uppsláttarfyrirsagnir um einstakar setningar.“

Að lokum segir Karl í tilkynningunni að sér þyki leitt að hafa setið þennan fund alltof lengi en að hann hafi sjálfur ekki lagt neitt orð í belg sem talist geti siðferðislega ámælisvert. Ákvörðun stjórnar Flokks fólksins um að vísa honum frá störfum muni engu breyta um áherslur hans í áframhaldandi störfum sem þingmaður. Karl ætlar sér, ásamt Ólafi Ísleifssyni, að vera óháður þingmaður það sem eftir lifir kjörtímabils.