Heilbrigðisráðherra hefur ákveðið að gera enn frekari tilslakanir á samkomutakmörkunum sem taka gildi á miðnætti í kvöld en þetta kemur fram í tilkynningu á vef Stjórnarráðsins. Reglugerðin verður í gildi í þrjár vikur, eða til 17. september næstkomandi.

Ríkisstjórnin tilkynnti í gær tilslakanir á gildandi samkomutakmörkunum en þar var kveðið á um að 500 manns gætu komið saman á viðburðum gegn því að framvísa neikvæðri niðurstöðu úr hraðprófi auk þess sem 200 mega koma saman á íþróttaæfingum og á veitingahúsum og skemmtistöðum, svo lengi sem hægt er að tryggja eins metra reglu.

Með breytingunum verður grímuskylda á viðburðum utandyra felld á brott og skýrar kveðið á um heimild til að halda einkasamkvæmi í veislusölum og sambærilegu húsnæði fram yfir miðnætti. Heimilt verður að halda einkasamkvæmi eftir klukkan 23 á stöðum sem hafa vínveitingaleyfi þar sem vínveitingaleyfið er aftur á móti ekki nýtt og ekki von á nýjum gestum.

Skrá skal alla gesti í slíkum samkvæmum með nafni, kennitölu og síma­númeri og skal skrá yfir gesti vera varðveitt í tvær vikur áður en henni er eytt. Heildarfjöldi gesta mega ekki fara yfir 200 manns.

Þá er einnig nánar kveðið á um útfærslu á notkun hraðprófa. Að því er kemur fram í tilkynningu um málið er stefnt að því að framkvæmd hraðprófa eins og kveðið er á um í reglugerðinni verði komin á fullt skrið um miðjan september og að prófin verði þá gjaldfrjáls. Í undirbúningi er að leita samninga um framkvæmdina.

Fréttin verður uppfærð.

Hér fyrir neðan má nálgast breytingarnar sem kynntar voru á vef Stjórnarráðsins.

Ekki krafa um grímu hjá sitjandi gestum á íþróttaviðburðum

Grímuskylda hefur almennt ekki verið utandyra nema á viðburðum svo sem íþróttakappleikjum þar sem gestir eru sitjandi en ekki hægt að virða eins metra nálægðarmörk. Með reglugerðinni sem tekur gildi á morgun verður ekki lengur þörf á að bera grímu við þessar aðstæður utandyra.

Einkasamkvæmi

Nauðsynlegt þótti að skýra nánar í reglugerð heimild til að halda einkasamkvæmi fram yfir miðnætti, í húsnæði þar sem vínveitingaleyfi er ekki nýtt þótt það kunni að vera til staðar og er það gert hér með. Hér er átt við samkvæmi þar sem skilgreindur hópur skráðra boðsgesta kemur saman, s.s. í brúðkaupum eða afmælisveislum.

Nánar um hraðpróf og heimild til að nýta þau

Með reglugerðarbreytingunni er nánar kveðið á um útfærslu á notkun hraðprófa á viðburðum. Í samræmi við það sem fram kom í tilkynningu Stjórnarráðsins í gær um boðaðar tilslakanir og notkun hraðprófa hefur í dag verið fundað með hagsmunaaðilum sem standa fyrir stórum viðburðum til samráðs um frekari útfærslu, s.s. fulltrúum íþróttahreyfingarinnar, samtökum atvinnuveitenda í sviðslistum og fleiri aðilum. Nú liggur fyrir ákvörðun um að á viðburðum þar sem hraðpróf eru nýtt verður fólki heimilt að taka niður grímu þegar það situr. Enn fremur verður börnum á leik- og grunnskólaaldri heimilt að mæta á slíka viðburði án þess að krafist sé niðurstöðu úr hraðprófi.

Stefnt er að því að framkvæmd hraðprófa eins og hér um ræðir verði komin á fullt skrið um miðjan september og að prófin verði þá gjaldfrjáls. Í undirbúningi er að leita samninga um framkvæmdina.