Yfirvöld í Flórída-ríki í Bandaríkjunum hafa ákveðið að endurtelja atkvæði til öldungardeildar Bandaríkjaþings og í ríkisstjórnarkosningum. Kosið var á þriðjudag en frambjóðendur hafa ítrekað ásakað hvern annan um svind. Liltu munar á frambjóðendum og samkvæmt lögum ríkisins skulu atkvæði vera talin aftur þegar munar innan við 0.5 prósent á þeim. 

Enn er verið að telja atkvæðin eftir kosningarnar á þriðjudaginn og eins og stendur er afar mjótt á munum. Munur á atkvæðafjölda Rick Scott, repúblikana og núverandi ríkisstjóra, og Bill Nelson, frambjóðanda Demókrata, var einungis 0.15 prósent eftir kosningarnar þar sem Scott hreppti hnossið. Í kapphlaupinu um ríkisstjórasætið var munurinn milli repúblikanans Ron DeSantis og demókratans Andrew Gillum aðeins 0.41 prósent, en DeSantis var með fleiri atkvæði. 

Endurtalningin verður gerð í sérstakri vél og verða úrslit gerð kunn fimmtudaginn næstkomandi þann 15. nóvember klukkan 20 að íslenskum tíma.

Donald Trump, forseti Bandaríkjanna, var heldur ósáttur með þetta nýjasta útspil og mótmælti því á Twitter-síðu sinni í kvöld. Sagði hann að verið væri að reyna að stela tveimur stórum kosningum í Flórída. „Við fylgjumst náið með!“

Í langflestum ríkum er endanleg niðurstaða komin í hús, en í nokkrum ríkjum, líkt og Flórída, hefur niðurstaðan ekki verið staðfest.