Elon Musk leysir upp stjórn Twitter og boðar breytingar

Elon Musk, nýr eig­andi Twitter, hefur nú leyst upp stjórn fyrirtækisins og tekið algera stjórn á samfélagsmiðlinum. Talið er að þetta hafi hann gert til þess að geta komið af stað miklum breytingum á miðlinum sem taka eigi gildi á næstunni.

Þá hefur hann einnig gefið starfs­mönnum Twitter það verk­efni að hefja nýja á­skriftar­leið á sam­fé­lags­miðlinum. Inni­falið í nýju á­skriftar­leiðinni verður auð­kenning á Twitter, en henni fylgir bláa merkið sem hingað til hefur verið kostnaðar­laust.

Á­skriftar­leiðin mun kosta 20 dollara á mánuði, um 3 þúsund krónur, og hefur Musk gefið starfs­mönnum til 7. nóvember til þess að taka á­skriftar­leiðina í notkun. Ef þeim tekst ekki að hefja nýju á­skriftar­leiðina í tækan tíma, verði þau rekin. Tækni­fjöl­miðillinn The Ver­ge fjallar um málið.

Á­skriftar­leiðin sem um ræðir heitir Twitter Blue og er í boði í dag fyrir 4,99 dollara á mánuði. Í dag veitir á­skriftar­leiðin not­endum aukinn að­gang að ýmsu auka­efni og fleiri stillingum á sam­fé­lags­miðlinum.

Musk vill breyta þessari á­skriftar­leið, gera hana dýrari og bæta auð­kenningar­merkinu við í pakkann. Ekki verði lengur hægt að fá bláa merkið án þess að borga í þessari á­skriftar­leið. Þeir sem borga Twitter Blue í dag munu hafa 90 daga til þess að borga nýju á­skriftina, annars missa þau bláa merkið.

Musk tók form­lega yfir sem eig­andi Twitter á fimmtu­daginn síðasta en hann hefur verið stað­fastur í að boða breytingar á sam­fé­lags­miðlinum. Eitt af fyrstu verkum hans var að reka alla helstu stjórn­endur fyrir­tækisins en öryggis­menn fylgdu þeim úr höfuð­stöðvum Twitter.

Auðkenningarmerkið bláa, var tekið í notkun árið 2009 en það var gert til þess að svara vaxandi bylgju af eftirhermum á samfélagsmiðlinum. Merkið varð fljótt stöðutákn, frekar en sönnun um auðkenni, en árið 2021 voru einungis 400 þúsund notendur með bláa merkið, en um 300 milljónir nota samfélagsmiðilinn daglega.