Eldur kom upp í flutningaskipi með sjö um borð sem var á leið með laxeldisfóður frá Bretlandseyjum til Þingeyrar á áttunda tímanum í kvöld.

Fram kemur í tilkynningu frá Landhelgisgæslunni að skipið hafi verið miðja vegu milli Færeyja og Íslands þegar neyðarkall barst frá skipinu en áhöfn þess náði að slökkva eldinn skömmu síðar. Björgunarþyrla frá Færeyjum var kölluð út en þurfti frá að hverfa. Engar þyrlur eru til taks hér á landi fyrr en á sunnudag.

Varðskipið Þór sem statt var á Héraðsflóa var sent til móts við skipið sem og færeyska varðskipið Brimill. Bæði varðskipin eru um 160 sjómílur frá flutningaskipinu. Skipið er vélarvana eftir eldsvoðann. Gert er ráð fyrir að Brimill dragi skipið til Færeyja en Þór heldur stefnunni að skipinu til öryggis og ef á þarf að halda.