Flugvél sem var á leið frá Los Angeles til Filippseyja í gær þurfti að snúa við eftir að eldur kom upp í væng hennar. Hún lenti aftur á flugvelli Los Angeles í heilu lagi og slasaðist enginn.

Vélin, sem var af gerðinni Boeing 777, er í eigu flugfélagsins Philippines Airlines, stærsta flugfélags Filippseyja. Farþegar vélarinnar lýstu þessu óhugnanlega atviki fyrir fréttastofu BBC, þegar fjórir háir hvellir heyrðust skyndilega í vélinni skömmu eftir að hún hafði tekið á loft.

„Við heyrðum fjóra háa hvelli. Það voru sprengingar,“ sagði einn farþeganna. Myndbönd náðust þá innan úr vélinni og af jörðu þar sem sjá má eldinn í hægri væng vélarinnar.

Flugmaður vélarinnar var þó hinn rólegasti þegar hann tilkynnti um neyðarástandið. „Mayday, mayday, mayday,“ tilkynnir hann flugturninum í Los Angeles yfirveguðum rómi. Hann óskað i svo eftir því að fá að lenda vélinni aftur á vellinum og sagði farþega þurfa aðstoð eftir lendingu. 342 voru um borð í vélinni.

Eftir vel heppnaða lendingu voru farþegar vélarinnar fluttir í aðra vél sem kom þeim loks til Filippseyja.

Hér að neðan má sjá myndbönd frá BBC af atvikinu.