Slökkviliðið á höfuðborgarsvæðinu var kallað út rétt eftir klukkan fjögur í dag. Þá logaði eldur í einbýlishúsi í Bröndukvísl. Einn íbúi var fluttur á slysadeild.

Sigurjón Hendriksson varðstjóri hjá SHS segir í samtali við Fréttablaðið að tilkynning hafi borist um að kviknað hafi í út frá kerti um klukkan 16:00. Húsráðendum hafi ekki tekist að slökkva eldinn og því forðað sér út úr húsinu.

Sigurjón segir að greiðlega hafi gengið að slökkva eldinn en mikill reykur hafi verið í húsinu og er slökkviliðið nú að reykræsta. Flytja þurfti einn íbúa hússins á slysadeild en meiðslin eru ekki talin alvarleg að sögn varðstjórans.