Eldur kom upp í iðnaðar­hús­næði í Dals­hrauni í Hafnar­firði í dag. Slökkvi­lið höfuð­borgar­svæðisins var snöggt á vett­vang og náði fljót­lega stjórn á eldinum.

Hlynur Höskulds­son, varð­stjóri í að­gerðar­stjórn hjá slökkvi­liðinu á höfuð­borgar­svæðinu, staðfestir þetta í samtali við Fréttablaðið. Hann segir slökkvi­liðið hafa komið í veg fyrir stór­tjón.

„Þetta hefði getað farið illa en við vorum snöggir á staðinn,“ segir Hlynur í samtali við Fréttablaðið.

Eldurinn átti upp­tök utan­dyra í iðnaðar­hús­næði við Dals­hraun. Ekki er vitað hvað or­sakaði elds­upp­tökum en eldurinn átti upp­tök í klæðningu á húsinu. Engin slys urðu á fólki en mikinn reyk lagði inn í húsið.

Slökkvi­lið var fljótt á vett­vang og kom í veg fyrir að eldurinn færi lengra, í þak og inn í hús.

Slökkvi­lið er að ljúka störfum á vett­vangi, rifin var klæðning á húsinu og tryggt að eldur kviknaði ekki aftur upp í húsinu.