Breytingar verða á akstursleiðum Strætó á morgun. Vegna framkvæmda sem hefjast á Hverfisgötu verður hluta götunnar lokað og mun Strætó því aka um Sæbraut í staðinn.

Til stendur að Hverfisgata verði endurgerð milli Ingólfsstrætis og Smiðjustígs og lagnir verða endurnýjaðar í Ingólfsstræti milli Hverfisgötu og Laugavegs.

Frá og með morgundeginum munu leiðir 1, 6, 11, 12, 13 og 14 því aka um Sæbraut í stað Hverfisgötu. Stoppistöðvarnar Stjórnarráðið, Þjóðleikhúsið, Bíó Paradís og Barónsstígur verða óvirkar meðan á framkvæmdum stendur.

Í staðinn munu framangreindar leiðir nota stoppistöðvar sem eru staðsettar við Kalkofnsveg og Sæbraut. Það eru stoppistöðvarnar: Arnarhóll/Lækjartorg, Harpa, Sæbraut/Vitastígur og Sæbraut/Frakkastígur.

Gert er ráð fyrir því að framkvæmdir standi yfir þar til í lok ágúst. Upplýsingar um framkvæmdirnar má nálgast á vef Reykjavíkurborgar.