Ekki svig­rúm fyrir til­slakanir fyrr en á næsta ári að mati Kára

Kári Stefáns­son, for­stjóri Ís­lenskrar erfða­greiningar, segist telja að fólk hafi ef til vill farið að slaka of mikið á eftir að sótt­varna­yfir­völd til­kynntu um mögu­legar til­slakanir fyrr í mánuðinum en þetta kom fram í kvöld­fréttum Stöðvar 2. Hann sagðist ekki telja að svig­rúm væri fyrir til­slakanir fyrir ára­mót.

Kári sagði í sam­tali við Stöð 2 að hann hafi á­hyggjur af stöðu far­aldursins hér á landi en hann segir það ganga verr að ná tökum á far­aldrinum nú heldur en í vor. Þá segir hann að fólk eigi nú erfiðara með að fara að fyrir­mælum sótt­varna­yfir­valda og að yfir­völdum hafi mis­tekist að hemja væntingar lands­manna.

„Eins og þegar þau sögðu fyrir tveimur vikum að nú ætluðu þau að létta á að­gerðum eftir viku. Um leið og þú segir það þá tekur fólk því sem svo að hægt sé að vera kæru­lausari en áður,“ sagði Kári og bætti við að það væri mikil­vægt að yfir­völd spái ekki í fram­tíðina með þessu móti.

„Þú átt ekki að segja fólki að þú munir kannski létta á að­gerðum eftir ein­hvern smá tíma. Mér finnst þetta vera mesti veik­leikinn í að­gerðum sótt­varna­yfir­valda, sem hafa að öðru leyti staðið sig af­skap­lega vel. Við getum ekki spáð fyrir um hvað gerist næst og við eigum ekki að reyna það,“ sagði Kári.

Ræða málin eftir helgi

Ríkisstjórnin mun ræða nánar um sóttvarnaraðgerðir eftir helgi í en Katrín Jakobsdóttir forsætisráðherra greindi frá því í gær að beðið hafi verið með að ræða málin vegna stöðu faraldursins og fjölgun tilfella.

„Í ljósi þess að staðan á faraldrinum er ekki nógu góð, við erum að sjá fjölgun tilfella bæði í gær og í dag, þá veit ég að ráðherrann hyggst doka við fram yfir helgi að meta stöðuna áður en næsta ákvörðun verður tekin,“ sagði Katrín.

Nú­verandi sótt­varna­ráð­stafanir eru í gildi til 1. desember næst­komandi en tíu manna sam­komu­bann er nú í gildi á landinu öllu. Síðast­liðna daga hefur fjöldi greindra til­fella kóróna­veiru­smits fjölgað nokkuð en alls greindust 21 í gær, þar af voru átta utan sótt­kvíar. Deginum þar áður greindust 20 með veiruna.

Rögn­valdur Ólafs­son, að­stoðar­yfir­lög­reglu­þjónn hjá al­manna­varna­deild ríkis­lög­reglu­stjóra, sagði fyrr í dag að ekki hafi tekist að rekja öll smit undan­farna daga og að það væri á­hyggju­efni. Hann sagði bráð­nauð­syn­legt að fólk færi í skimun og veita smitrakningar­teyminu sannar og góðar upp­lýsingar.